Ang maayong tawo kawilihan gyud

Si Kalihim Jesse Robredo ug si Pilot Captain Jessup Bahinting pulos gikawilihan tungod sa ilang sulondon nga kinaiya, may liderato, pulos maayong haligi sa pamilya ug maayo nga midala sa ilang katungdanan.

Daghan baya usab ang susama kanila, tungod kay ang kaayo sa kinaiya sa tawo ug ang maayong binuhatan niini anha naman kahatagi sa hingpit nga pag-ila sa iyang kamatayon.

May mga recognition man nga mahitabo sa iyang maayong binuhatan samtang buhi pa siya, apan kasagaran niini nga tinagsip ug tinipsing lang tungod kay padayon pa man siya sa iyang paghipos og dugang kadungganan.

Apan ang pinta ug katibuk-ang pasidungog kaniya, inigtaliwan na niya, kay mao may katapusan sa iyang pagka-siya. Sa iyang pagka-maayong tawo, way laing iganti kaniya sa tawo nga nasinati sa iyang maayong mga hiyas ug sulundon ug matulon-anong binuhatan, gawas sa mga pagdayeg, pag-ila ug paghandom sa tanan niyang maayong binuhatan. Lahi kaayo sa mga tawong  mamatay nga nainila sa di maayong kinaiya, nga bisan may maayo pang binuhatan apan kumo kay sa buhi pa siya hilabihan niya ka higpit ug ka–estriko o kaha kaasyuso kay nagpatawag siya nga usa ka perfectionist, ang iyang mga kaila, silingan, ug mga higala mosil-ing man sa iyang haya apan imbis mopatulo sa luha, mangluro ug sulod sa huna-huna moingon pa, “maayo ra”.

Mao kini ang dagan sa kinabuhi sa tawo, nga sa panukdanan pa lang sa tawo, kaantigo na kaayo motimbangtimbang kinsay mamatay nga angay pasidunggan og mga pagdayeg ug kinsa usab kadtong di angay sa maong pasidungog.

Kun kitang mga tawo kaantigo niini, mas labaw pa ang atong magbubuhat kansang panukdanan sa pagpakanaog og desisyon kinsay angay patagamtamon og tumang kalipay ug ang pasugamakon sa silot nga way katapusan puno kaayo sa hustisya.

Ang tanan Niyang pamaagi ug pamalaod bahin sa mangamatay nga may maayong kapalaran ug sa mangamatay nga maot og kapalaran sa adlaw sa paghukom.