Few good men!

Usa ka higalang operator sa taxi misugilon kanako nga usa ka buntag, usa sa iyang mga driver mitunol ngadto kaniya og usa ka laptop, nabiyaan kono sa pasahero. Maayo man gani kono kay wala makit-i sa laing mga pasahero. Diha na siya kakita sa laptop sa dayon na niyang garahe.

Laing higala, misugilon usab nga iyang nabiyaan ang iyang pitaka sulod sa taxi. Mao pay iyang pagkahibawo nga nabilin ang iyang pitaka pag-abot na niya sa ila … ug wala na siya magpaabot nga ma-recover pa. Apan, pila ka minutos, may taxi nga mihunong atubangan sa ilang gate, misilbato, ug sa iyang paggawas gitunol sa driver ngadto kaniya ang pitaka. Subra ang iyang pagpasalamat …. mitunol siya’g pahinungod, apan wa dawata sa driver.

Laing higala, usa ka senior citizen, misugilon usab kanako nga usa ka higayon, tungod kay puno na ang PUJ, kapyot na lang. Naglisud siya kaylagi, kapoy na ang kalawasan, ug duna pa siyay dala nga bag. 

Tungod kay moderno na man ang panahon, walay mi-offer kaniya’g lingkoranan, obsolete na ang pagka-gentleman … pagka-chivalrous. Apan, sa wa niya damha, usa ka bugoy-looking nga batan-on, naglago lang, kapyot pud, mi-offer nga siyay mobitbit sa backpack sa tigulang nga gipaningot nag maayo, bisag kusog ang hangin.

Naka-experience sad ko, usa ka higayon, sa may Carbon market dapit, na-shot sa lungag ang pangunahang ligid sa akong kotse. Unsa may akong mahimo? Dihay pila ka tawo nga naglingkod sa aseras, apan wa lang magtagad, gasiga lang ang mga mata.

Apan, kalit dihay tawo nga dakug lawas, milabay, ug sa walay tingog-tingog, iyang gialsa ang ligid, dungan ang pagsinyas kanako pagpaabante, ug nalibre ang ligid. Miaksyon kog gawas sa awto aron motunol og kwarta, pasalamat sa iyang gibuhat, apan, misutoy siya sa unahan. Sa ato pa, wa siya magkinahanglan og balus sa maayo niyang buhat.

Sa teenager pa ko, sa ato pa, dugaydugay na gyud, sa diha pay airbase sa Amerikanhong Kasundalohan sa Mactan Airbase … usa ka higayon, dihay owner jeep nga naaberiya. Usa ra ka tawo ang mihandos. Naatol nga dihay tulo ka US airmen naglakaw, ug ilang nalabyan ang jeep nga naabireya.

Automatic, sa walay paghunahuna, mitabang silag handos, hangtud nga miandar ang jeep. Of course, wala maghuwat nga bayran. Waa ni nila. Daghan ang susamang mga sugilanon ang atong nadungog, and perhaps, inyo sad nasinati.

Apan, diyutay ra ni sila. Duna gyuy tawo nga nahimo nang hobby ang pagtabang sa uban, sa walay pagpaabot og return. Mao kini ang giingon nga FEW GOOD MEN

Karon, ato kining nasinati kanila ni Sec. Jesse Robredo ug Capt. Jessup Bajinting .. Duha sa mga Few Good Men. Naglisud si Noynoy pagpangita kinsay ipuli kang Robredo. Duna may ikapuli apan, lisud sundon ang mga mithi ug binuhatan ni Robredo.

Sa atong nasud karon, ilabina sa natad sa panggobiyerno, Very few na gyud kaayo ang Good Men. Perhaps, ubay-ubay pa ni sila, apan, di lang makit-an. Ambut ngano. Ang mga badlongon man hinoon ang daling makit-an. Pastilan!