Ang unang sekreto sa pakiggubat mao ni: “Ilha ang imong kaugalingon ug ilha ang imong mga kaaway.” Daghan sa mga pakigharong ug pakiggubat ang nahimong dakong kapildihan ug kapakyasan sanglit, molahos ra man og harong ug dili pa mohimo og pag-ila-ila sa sitwasyon. Ang pag-ila sa imong kaugalingon ang nagpasabot og pagpamalandong sa imong kapasidad ug kahimanan. Ang pangutana: “Kaya Mo Ba?” Ang pag-ila sa kaaway nagpasabot nga imong sutaon kun kinsa sila, asa sila, unsa sila ug unsa ang ilang kahuyangan.
Ang kinabuhi usa ka makanunayong gubat tali sa mga kalig-on ug kahuyangan sa kinabuhing tawhanon. Ang hinumdoman nga ang matuod nga pakiggubat wala mahitabo sa gawas kondili sa sulod mismo sa matag usa kanato. Ang mga panghitabo sa gawas nato mao ang mga hinungaw sa tinud-anay nga mga panghitabo sa atong kaugalingong pagkatawo ... Mao nga ilhon gyud nato ang atong kaugalingon aron sa ingon maila pud nato ang atong mga kaaway.