Hangtud sa katapusan sa iyang kinabuhi, nagpabiling yano ang pagpuyo ni DILG Sec. Jesse Robredo bisan sa nagmungingi nga kalampusan sa iyang karera sa politika. Karon nga kumpirmado nang patay si Robredo, nanggawas na ang mga maayong buhat ni Robredo nga nakaaghat sa publiko sa pagsaludar ug paghatag sa labing taas nga respeto alang sa batan-on ug abtik nga kalihim.
Ang kinabuhi ni Robredo ang angayan nga kapanaminan sa mga politiko sa nasud nga napuno sa hambog ug wa’y kasudlan ang grabeng kaabusado sa posisyon nga gitunol nila sa katawhan. Si Robredo, bisan sa iyang kamatayon, nagpabiling buhing handumanan kung unsa ang tukma ug tarong nga alagad sa katawhan.
Usa ka higala dinhi sa Sugbo ang nag-ingon, daw sa nabalik ang kasaysayan dihang iyang nadunggan ang balita nga kumpirmadong patay na si Robredo. Sa iyang pangidaron nga sitenta, buhi pa sa iyang panumduman ang gibati sa mga Pilipino dihang ilang nabalitaan nga nag-crash ang eroplano nga gisakyan ni Presidente Ramon Magsaysay.
Ingon og nawad-an og tinuod nga amahan ang mga tawo kaniadto sa kamatayon ni Magsaysay nga giisip nga usa ka yano nga lider nga mahimong mahinabi ni bisan kinsa ug maglakaw lang nga mag-tsinelas. Nahimong kinaham nga lider si Magsaysay tungod sa iyang ka-simple ug kakugihan sa pagtabang sa mga kabus nga maoy nahimong sentro sa iyang pamunoan. Si Magsaysay ug Robredo. Managsama ang ilang katakos sa paggakos sa mga yanong tawo—mga kabus nga wa’y kapa-ingnan ug wa’y tingog ug gahum sa pagpuyo ug pagpangayo sa ilang katungod. Ang mga tawo sa Naga City nakapamatuod sa pagkaligdong ni Robredo dihang wa’ ma-usab ang iyang pagtagad sa mga tawo bisan sa labing taas nga posisyon nga gihuptan sa Dept. of Interior and Local Government. Daghan ang nakapamatuod nga magsakay lang og bus si Robredo gikan sa kaulohan paingon sa Naga kun mopauli bisan pa kung aduna na siyay posisyon gihuptan. Daghan ‘sab ang nakapamatuod nga si Robredo ang mangunay sa ilang mga clean-up drive nga mag-shorts lang ug mag-tsinelas. Wa’y makatug-an kun idolo ba ni Robredo si Magsaysay. Apan siguro ila lang gihimo ang unsay tukma—ang mahimong yano nga lider apan adunay di’ ordinaryong nabuhat sa katawhan nga maoy tinuod nilang boss. Sama ni Magsaysay nga mahimo lang maduol sa mga kabus bisan unsang orasa, mao ‘sab ang paghulagway sa mga taga Naga sa ilang labing pinanggang mayor. Napukaw ang konsensya ni Robredo nga mosu’d sa politika sa pagkamatay ni senador Ninoy Aquino niadtong 1983. Gibiyaan ni Robredo ang pribadong sektor ug nitubag sa hagit sa paglingkod sa katawhan ug nahimong labing batan-ong mayor sa edad nga 29. Su’d sa unom ka termino, iyang gibuhos ang panahon sa pagpalambo sa Naga City. Ang maong kalampusan ang nagbukas ni Robredo og daghang mga pasidungog bisan ang Ramon Magsaysay Award nga bersyon sa Nobel Peace Prize sa Asya, nisaludar sa mga gihimo ni Robredo. Sulagma ba nga maisip nga sa presidente nga susama og gawi ni Robredo ang gitunol nga labing taas nga pasidungog. Sulagma lang ba nga nakab-ot ni Robredo ang labing taas nga posisyon sa gobyerno atol sa administrasyon sa anak sa iyang gi-idolo nga si anhing senador Ninoy Aquino. Sulagma lang ba ning tanan nga kung kanus-a ‘ta nagkinahanglan og ligdong di’ ma-kwestyon nga integridad nga mga lider, sayo silang kuhaon sa kahitas-an.
Sulagma ba nga maisip nga nakaplagan ang patay’ng lawas ni Robredo sa adlaw kanus-a gihandum ang kamatayon ni Ninoy ug sa adlaw kanus-a nahitabo ‘sab niadtong Agusto 21, 1971 ang Plaza Miranda bombing nga usa sa nakapausab sa dagan sa politika sa nasud.
Usa ka dakong hagit ang gibilin ni Robredo sa katawhan labi na sa mga politiko nga nidako na ang ulo dihang naghupot na og posisyon. Kung nahimo ni Robredo nga magpuyo nga yano o simple bisan sa dakong posisyon nga gihuptan, nganong di’ man ni mahimo sa uban?
Ang labing taas nga opisyal sa DILG nagpakita sa mga tukmang lakang nga angay untang himuon sa mga mayor, gobernador ug uban pang gipiling opisyal, mga pulis ug mga taga BJMP nga mahimo ra gyud ang mga katungdanan bisan sa pagpuyo nga simple. Labaw sa tanan, hagit ang gibilin ni Robredo kanatong tanan nga bisan kun nagkapuliki ‘tang tanan sa trabaho—ang pamilya lang gihapon ang labing mahinungdanon nga mga tawo sa atong kinabuhi.
Email: rico_lucena@abs-cbn.com or ricolucena@yahoo.com