Ang kamatayon ni Ninoy nga nakaukay sa katawhan

Gisaulog sa katawhang Pilipinhon ang ika-29 ka tuig nga pagpamusil kang kanhi Senador Benigno Aquino Jr. sa iyang paghidangat sa Pilipinas gikan sa gawas sa nasud niadtong Agosto 21, 1983 nga maoy nakaingon sa hinanali niyang kamatayon nga nakapaukay sa katawhang Pilipinhon.

Si Ninoy maoy bana ni anhing Presidente Corazon Aquino ug amahan usab sa presidente karon sa nasud nga si Presidente Benigno Semeon Aquino III. Ang gipatay nga senador maoy giila nga higpit nga tigpanaway sa pamunoan ni kanhi presidente Ferdinand Marcos ug dihang giproklamar na niini ang Presidential Decree 1081 kon Martial Law niadtong Septiyembre 21, 1972, si Ninoy Aquino usab ang nag-una sa listahan sa mga gidakop nga oposisyon ug gibalhog sa bilanggoan.

Matud pa nila nga nahimo lamang nga kabahin sa pagkaukay sa katawhang Pilipino ang kamatayon ni Ninoy Aquino tungod kay daghan na nga mga higayon nga naukay ang katawhan sa wala pa ang iyang kamatayon. Ang pipila ka mga panghitabo nga nakapaukay sa katawhan mao ang pagpamomba nga nahitabo sa Plaza Miranda nga mikalas og mga kinabuhi ug miangol usab sa mga inilang politiko nga mialkontra sa pamunoan ni Marcos.

Dugang pa nila nga sa paglanat sa mga tuig sa pamunoan ni Marcos daw nagkainit usab ang mga tawo nga mialkontra sa iyang administrasyon pinaagi sa gipahigayon nga mga protesta sa kadalanan ug pipila ka mga nahitabong pagpamomba.

Ang maong kainit sa mga protesta sa katawhan maoy nakaaghat kang Marcos sa pagdeklarar sa PD 1081 kon Martial Law ug ubos sa gahom sa military maoy gipatuman ang pagdakop sa mga tawo nga nagsaway sa iyang administrasyon nga naglakip na sa lider sa mga oposisyon nga si kanhi Senador Ninoy Aquino ug ang pipila niya ka mga kauban ang nanglarga sa pagsibat ngadto sa gawas sa nasud.