Husto bitaw nga ang mga ground commander sa kabomberohan dili gayud angay nga magpa-interview sa media samtang magpadayon pa ang sunog kay mabalda ang ilang trabaho.
Usahay ingon niini ang gihimo ni Senior Superintendent Aderson Comar, ang kanhi fire marshall sa kabomberohan sa dakbayan sa Sugbo.
Kamong mga opisyal sa kabomberohan, ayaw mo kahadlok nga masuko kaninyo ang mga reporters kun dili kamo magpa-interview. Kun magsigi mo’g pa-interview, mahurot ang inyong oras nga dili na kamo makadereher sa fire fighting operations.
Sayonan ka nga pwerteng daghana nga mga reporters nga magbanus-banus sa pag-interview? Ang interview angay nga unya na kun mapawong na ang sunog, aw bisan kun padayon pa nga nagsiga ang kayo apan nag-contain na sa usa ka dapit, sa ato pa nga dili na peligro nga makakaylap pa sa laing kabalayan.
* * *
Angay gayud nga hatagan og pasidungog si Captain Jessup Bahinting, kadtong piloto nga mitabang nga makuha pagdali ang anti-venom vaccines gikan sa Camiguin aron madala dayon dinhi sa dakbayan sa Sugbo para ma-injection dayon sa tawo nga napaakan og bitin nga Cobra.
Ang LifeSaver’s Award angay nga adto gayud ihatag para kang Bahinting atol sa Charter Day Anniversary sa dakbayan sa umaabot nga Pebrero 24. Kun wala pa si Captain Bahinting mosugot nga gamiton ang iyang gamay’ng eroplano, patay na tingali si Ronald Aventurado kay makalamay man pag-ayo ang hilo sa Cobra.
Nahibaw-an nga si Captain Bahinting miapil usab diay gani sa daghang mga rescue ug relief operations sa mga dapit nga dunay katalagman nga nahitabo, sama sa dakung landslide didto sa Guinsaugon, Leyte sa mga biktima niadtong linog nga miigo sa Negros Oriental ug sa uban pang dapit sa nasud.
* * *
Kahilakon ko naghuna-huna sa nahitabo ni DILG Secretary Jesse Robredo nga nagpabiling “missing” human mahagsa sa dagat ang gisakyan niini nga gamay’ng eroplano.
Dili kami higala, wala gani siya makaila nako. Apan ang nakapatandog kanako mao ang iyang pagtagad ngadto sa iyang anak. Nagdali si Robredo nga mipauli sa Naga City human nga mitambong sa duha ka kalihukan dinhi sa Sugbo, aron lang gayud makatambong sa pag-award sa iyang anak sa Naga City government.
Ingon niini ang batasan sa usa ka buotan nga amahan nga nakapatandog nako. Nahuna-huna man gud nako nga duna man gani ubang amahan nga dili lang maghuna-huna kun nakakaon ba ang ilang anak atul sa oras nga tingkaon, apan sila naghubog-hubog.
Suheto gayud kaayo ko nga dunay mga amahan nga kun molakaw, daw ulitawo tan-awon, sinaw kaayo’g hinapay, apan ang ilang anak nagsul-ob lang tawon og lagu ug gision nga sapot, ang uban gani walay purol. Ang pagkatawo ni Robredo angay’ng sundon ug kuhaan nato og pagtulon-an.
Aksidente lang gayud nga ang gisakyan nga eroplano ni Robredo nakasugat og mechanical defect. Kun wala pa tingali magdali si Robredo pagpauli sa Naga City, hayan buhi pa siya hangtud karon.