Nakaila ang mga opisyal sa Bureau of Customs Port of Cebu sa tinuod nga mga smuggler sa siyam ka mga Korean cars nga nasakmit gikan sa Sumada Total Golden Motor Care sa J.L. Briones Street, North Reclamation Area. Apan maayo unta og walay cover-up sa imbestigasyon aron mataral sa hukmanan ang mga nagpayuhot sa Hyundai Tucson, duha ka abuhong Kia Sorento, itom nga Kia Sorento, puti nga Kia Sorento, duha ka abuhon nga Hyundai Starex van, puti nga Kia Retona ug SangYong Korando.
Nahibaw-an sa pasiunang imbestigasyon nga ang Sumada Total gipanag-iya og usa ka Koreano nga si Jung Choi, apan sumala pa sa report nga ang broker nga nailhan sa ngalan nga "Marc" ug usa ka Filipino-Chinese nga negosyante, apil na ang usa ka anak sa usa ka heneral, kunsabo sa ilegal nga negosyo sa Koreano.
Si Cebu Customs District Collector Ronnie Silvestre miisyu na og warrant of seizure and detention batok sa siyam ka sakyanan, human masuta nga ang pag-import niini nakalapas sa Tariff and Customs Code of the Philippines. Ang warehouse ni Choi giduaw sa mga sakop sa Customs Police Division nga sila si SA1 Enrico Mongaya, SA1 Andie Catre, SA1 Danilo Dalucapas SA1 Jose Benedye Mabalo, SA1 Constancio Ecarma ug SA1 Julius Reynoso Galang armado og mission order pinetsahan Agosto 13 nga pinirmahan ni Customs Commissioner Ruffy Biazon. Naaktohan sa grupo ni Mongaya ang mga sakyanan nga gipang-rebuild sa warehouse ni Choi. Ang mga sakyanan gipangguroy gamit ang towing truck ug karon anaa sa yarda atubangan sa customs building sa pier 6.
Apan unsaon kaha pag-esplikar sa mga tinugyanan sa adwana nga aduna man gyuy usa o duha sa maong mga sakyanan nga tibuok. Ang pag-import og tibuok nga ginamit nga sakyanan gidili sa EO 156. Daghan sa maong mga sakyanan aduna tinuod sinumpayan, apan klarong dili bungkag sa dihang gipaabot dinhi sa Pilipinas gikan sa Korea.
Dili ko motuo nga gikan kini sa laing puerto (kay ang nag-broker-broker niini usa man ka Sugboanon), apan motuo ko nga gi-"swing" (gipalusot-pagawas) kini gikan sa Cebu International Port (CIP). Kun swing operations kini, asa man diay ang mga tinugyanan sa Wharfinger nga maoy gitahasan pagbantay sa gate sa CIP? Si Mike Mesina, tinugyanan sa ESS Motor Vehicle Monitoring and Clearance Office nagkanayon nga ang maong kargamento wala mag-agi sa maong buhatan subay sa ilang mga dokumento. Subayon usab sa maong buhatan kun nganong naabot kini sa warehouse ni Choi. Ang warehouse ni Choi, base sa pasiuna natong panukiduki, wala kini DTI-accreditation isip "re-builder" og mga sakyanan. Kini usa na ka violation sa balaod. Apan nahimong malampuson ang negosyo sa Sumada Total tungod sa tabang sa usa ka "non-signing broker" nga sumala pa sa akong mga tinubdan gikan sa customs, usa sa mga investor sa warehouse ni Choi. Pero, maayo unta og walay cover up sa imbestigasyon, aron adunay Sugboanon nga masulayan og pasaka og kasong smuggling ni Biazon.
* * *