Ang mga sulagma nga panghitabo

Ang katilingban nga kusganong mipadayag og pagsupak sa House Bill 4244 o Reproductive Health Bill nga gituki karon sa atong mga magbabalaod sa nasud daw gibati na og kabalaka nga mahingpit kining balaod sanglit kusganon man usab kining gisuportahan ni Pangulong Benigno Simeon Aquino III.

Ang atong kaparian nga maoy nag-una sa pagpadayag og mga pagsupak sa maong balaodnon maoy ilang gipasabot ang pagpatamod sa kabililhon sa kinabuhi ug ang pagsunod sa kabubut-on sa atong Labaw nga Makagagahom nga wala lamang panumbalinga sa mga magbabalaod nga nagsuporta sa RH Bill.

Nunot sa kusganon nga mga pagsupak sa maong balaodnon ang pipila miingon nga niining panahona maoy atong makita ang duha ka matang sa mga tawo nga ang una mao ang pagtuo sa pagpanginlabot sa Ginoo pinaagi sa gipakita nga mga timailhan sa iyang pagsupak niini.

Si Dr. Josef Rene Bullecer nga giilang usa ka pro life advocate dinhi sa nasud iyang gipadayag nga niadtong panahon nga nagkainit ang pagtuki sa maong balaodnon sa mga kongresista kalit usab nga nahitabo ang pag-impeach kang kanhi presidente Joseph Estrada.

Nahunong ang pagtuki sa RH Bill kay mitakli na man ang pagtagad sa mga kongresista sa impeachment case sa kanhi presidente nga misangko gayod sa pagkanaug niini sa puwesto. Dugang pa ni Dr. Bullecer nga subli na usab nga gituki sa kongreso ang RH Bill ug taliwala sa nagkainit na unta nga debate wala lamang damha nga gikusokuso sa bagyong Ondoy ang tibuok Metro Manila nga maoy nakaingon sa kalit nga paghunong sa sesyon sa mga kongresista kay nasinati man ang brownout sa tibuok Metro Manila ug grabe usab ang nasinati nga pagbaha. Si Dr. Bullecer miingon nga niining panahona maoy gihimo sa mga kongresista ang subli na usab nga pagtuki sa maong balaodnon apan naigo na usab sa bagyong Gener ang Luzon area nga mao usab ang hinungdan sa grabeng pagbaha. Bisan sa grabeng pagbaha sa Luzon area, wala mohunong ang mga kongresista ug wala lamang damha nga miigo na usab ang laing bagyo nga Helen nga nakamugna usab og dugang pa nga mga pagbaha sa maong dapit. Hinuon sukwahi kaayo ang gipadayag sa pipila ka mga tawo sa gipadayag nga pagtuo ni Bullecer tungod kay alang kanila ang mga katalagman karon nga nahitabo sa kaulohan walay kalambigitan sa gituki nga RH Bill ug kun nahitabo man ang grabeng mga pagbaha maoy ilang pagtuo nga kini usa lamang ka sulagma nga panghitabo. (Romeo T. Limpangog)