Death Retreat

Kaniadto akong gipaambit dinhi ang Dream Retreat ni Walt Disney. Karon tugoti ko nga atong saw-an ang isyu kalabot sa Death Retreat. Kay unsa man diay kining Death Retreat? Ang Death Retreat mao ang paggahin og igong panahon diha sa pagpamalandong, pagdawat ug pag-andam sa atong tagsa-tagsa ka mga kamatayon ug sa kamatayon sa atong mga kaubanan sa pamilya o dili ba mga higala. Ang Death Retreat ang na-impluwensiya sa panghunahuna nila ni Mitch Albom sa iyang Libro: “Tuesdays with Morrie ug ni Fr. Larry Tan, SDB sa iyang libro: “Homebound.” Naghisgot sila sa kamatuoran sa kamatayon nga angayan natong pangandaman. Ang pamaagi sa maong retreat mao kining mosunod: Paghinumdom (sa mga kalampusan, ingon man kapakyasan diha sa atong panaw sa kinabuhi). Pagpasalamat (pag-ihap sa mga panalangin nga atong nadawat gikan sa Kahitas-an) paglaraw (paggambalay sa mga mahitabo o dagan sa imong haya ingon man ang paghimo sa mga katapusang tugon pinaagi sa sulat pinirmahan nimo mismo).

Pagsaulog (Ang paghimo og maampuong pagpatidlom sa gipaabot nga panahon diin ikaw makig-atubang na sa imong Magbubuhat). Wala ko kamo tungloha. Gipamata ko lang kamo sa kamatuoran sa kamatayon. Busa pangandam na! Abli ug tagana ako nga ubanan ang bisan kinsa nga buot mopatidlom sa kamatayon pinaagi sa Death Retreat. Alang sa dugang kasayuran tawag sa telepono: 4318158. Kalipay ko ingon nga imong death planner ang pag-alagad kanimo aron planuhon mo usab ang imong kamatayon.