Sa United States, di pa nagtatagal
Sa loob ng sine maraming pinatay;
May sira ang ulo’t kaluluwa’y halang
Parang Maguindanao, maraming pinaslang!
Pangyayaring ito’y kaiba sa lahat
Walang nag-akalang ito’y magaganap;
Tahimik sa US walang kalamidad
Kaya ang nangyari ay walang katulad!
Kung dito sa bansa ito ay nangyari
Masasabi nating s’ya’y taong api
Mga mamamayang nanonood sine –
Naglilibang lamang pero naduhagi!
Maganda ang “Batman” na siyang palabas
Pulis at bandido mga dala’y armas
Sila’y nagsagupa’t putuka’y malakas –
Sumabay ng putok kriminal na hudas!
Matatanda’t batang naglilibang lamang
Sa loob ng sine nawalan ng buhay;
Ibang nakaligtas ay pawang sugatan
Kaya ang barilan naging totohanan!
Ang nangyaring ito’y nakapagtataka
Naganap pa naman sa bansang sagana;
Kung dito naganap nasabing disgrasya
Ang inaping tao’y hirap na hirap na!
Kung tayo’y hirap man sa buhay na ito
Tayo’y matiising mga Pilipino;
Di natin gagawin ang krimeng ganito
Na maraming buhay nasasakripisyo!
Hindi natin hangad na ang matatanda
Sa munting dibersyon agad nawawala;
Mga kabataang “Batman” halimbawa
Darating ang araw pag-asa ng bansa!
Hindi rin masamang tayo ay maglibang
Manood ng sine – madalas o minsan;
Pero ang marapat maging maingat lang
Palaging alisto sa pinupuntahan!
Unang alertado’y may mga sinehan
Mga pumapasok ay dapat kapkapan;
Bawal sa kanila’y electronic device –
Baril at patalim bakit hindi bawal?