Ang hagit

Human mohubas ang tubig nga mibaha ug milunop sa Metro Manila ug kasikbit nga mga lalawigan didto sa kaulohan mibantang sa mga mata sa katawhan ang nagbukid nga basura sa mga dapit nga nabahaan.

Ang baha ug lunop mugna sa hanging habagat nga gipakusog sa mga tawong nanimuyo sa mga dapit nga agianan sa tubig samtang ang mga basura gikan sa mga tawo nga wala magpakabana sa iyang palibot ug kalikopan.

Sigon sa datus nga gipagawas sa nasudnong kagamhanan miabot sobra sa usa ka gatos ka libo ka mga pamilya ang nanimuyo sa mga agianan sa tubig didto sa Metro Manila. Tungod niini, ang nasudnong kagamhanan mipadali sa pagpabalhin sa mga informal settlers sa mga bakanting resettlement areas.

Ako nagtoo nga kining sobra sa usa ka gatos ka libo ka mga informal settlers dili taga Metro Manila kun dili taga lain kining probinsiya kinsa miadto sa kaulohan aron manimpalad ug mangita’g kaharohay sa ilang panginabuhian apan gidimalas. Kining maong mga informal settlers labing seguro mga yutaan sa ilang mga probinsiya pero gipamaligya ang yuta kay namalhin pagpuyo ug nanimpalad sa mga dagkong siyudad apan lagi gidimalas.

Busa kun gusto man nga hawanan sa nasudnong kagamhanan ang mga urban centers sa mga informal settlers panahon na seguro nga iyang palig-onon ang ekonomiya sa mga lalawigan ug rural areas aron dili na maingganyo ang mga taga probinsiya o lalawigan pagdagsa sa mga urban centers aron didto manimpalad.

Ang resettlement dili sulbad sa nagdasok nga mga informal settlers sa mga dagkong siyudad sa nasud tungod kay ang mga informal settlers padayong mag abot-abot sa mga urban centers hangtod dili mahatagan og maayong kapanginabuhian ug ekonomikanhong oportunidad ang mga taga probinsiya o rural areas.

Ang nasudnong kagamhanan kinahanglang moapod-apod sa ekonomikanhong oportunidad sa mga rural areas ug kinahanglan nga dili lamang kini mosentro sa iyang paglambo diha sa mga dagkong siyudad.

Kinahanglang ipakita sa nasudnong kagamhanan sa mga taga probinsiya nga wala na nila kinahanglana ang paglangyaw sa laing mga lugar aron mangita og kaharohay sa ilang panginabuhi tungod anaa na kini sa ilang tugkaran. Mao kini ang akong hagit ngadto sa atong nasudnong kagamhanan.

Samtang ang mga lokal nga kagamhanan ako usab nga gihagit sa pagdapit sa mga negosyante sa pagbubo sa ilang puhonan ug pagbutang og mga negosyo sa ilang lokalidad aron makahatag sila og trabaho sa ilang katawhan. Sa ingon ani nga pamaagi, ako nagtoo nga moundang na ang pagbaha sa mga taga probinsiya ngadto sa mga dagkong siyudad sa nasud nga moresulta lamang sa pagpamuyo sa mga dapit nga agianan sa tubig.