Ako o gobiyerno?

Buloy: Bitoy unsa kahay angay buhaton nga madato ta?

Bitoy: Resayin pagkapobre.

Buloy: Ha? Nganong wala man lagi ka moresayn?

Bitoy: Walay modawat sa akong resignasyon(Toink!/Aguy!)

Hehehehehehehehehehehehe!

Kung mahimo pa lang moluwat sa pagkakabos mag-ilog siguro sa linya ang mga naglisod sa panginabuhian. Gani bisan siguro ang gitawag og middle class mahimong moilog pa sa linya kun ingon pa lang kadali ang pagbiya sa kalisod.

Apan unsa bay sinugdanan sa kakabos?

Dunay mga magsasaysay ug arkeyologo nagtuo nga nagsugod pa sa labing unang kultura sa mga tawo nga mga bato pa ang galamiton ang pag-ila sa adunahan ug kabos. Ang mga bag-ong nadiskobrehan nga mga gikulit sa langob nagpakita nga duna nay pag-ila sa estilo sa panginabuhi sa maong panahon.

Sa maninglis pa “stone age”.

Menggoy: Toy kun nagsugod na ang pag-ila sa pobre ug dato sa stone age, giunsa man pag-ila ang dato niadto?

Bitoy: Aw unsa pa! ang daghan og natigom nga bato(Toink!/Ayay!) Hehehehehehehehehehehe!

Kun ingon ka matinguhaon ang mga maniniksik pagtultol diin gyud magsugod ang pag-ila sa kadato ug kapobre dili na importante sa mga naglisod karon sa panginabuhian. Ang labing importante karon sa mga naa sa hut-ong sa kakabus mao ang mahimo sa kagamhanan paghaw-as nila sa kalisod.

Daghan ang nagpatuo nga ang kahimtang sa panginabuhian mag-agad ra gyud sa desisyon ug paningkamot sa usa’g-usa. Apan mas daghan ang mibasol sa Gobiyerno nga maoy napakyas pagsulbad sa problema.

Usa sa labing dili makiangayon nga wala gyud matagad sa Gobiyerno ang dili managsamang umento sa suholan sa mga anak sa singot sa matag rehiyon. Ang kaulohan nga dunay taas nga suholan mas ubos ang presyo sa gasolina ikompara sa ubang rehiyon nga ubos ang minimum nga suholan. Taympa sa gud! unsaon man tinuod pagsugod sa usa ka nag-ilaid aron pag-umento kun wala siyay magamit pagpalambo sa iyang panginabuhian?

Apan tinuod kaha nga bisan ang paningkamot mag-agad gihapon sa unsay nalatid sa imong kapalaran?

Kun duna may mga naningkamot nga nagmalampuson duna say mga naningkamot nga napakyas. Duna kaha gyuy angay matulisok sa problema sa kakabos?

Nakasulay ka na ba og pangutana sa imong kaugalingon? Ako o ang gobiyerno?

Kun gikinahanglan ang paningkamot aron molambo ang panginabuhian gikinahanglan usab ang pag-abag sa kagamhanan aron kahatagan og agianan ang gipangitang kalamboan.

Sa ato pa angayan nga mohimo una og epektibo ug malungtarong paagi ang gobiyerno pagsulbad sa problema sa kakabos dayon ang paningkamot sa mga hingtungdan aron makab-ot ang kalamposan.

(emailad: [email protected]. )