Ang panapos nga pulong sa pagpanumpa

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Gibatasan na sa atong mga opisyal sa kagamhanan ang pagpanumpa sa dili pa sila mosugod sa pag-asumer sa ilang katungdanan nga ilang pagahuptan.

Gihimo ang pagpanumpa sa katungdanan sa mga opisyal nga pinili sa katawhan human sa naangkon nga kadaugan sa gihimong piniliay ug bisan na ngadto sa mga tinudlo nga mga opisyal.

Sa ilang pagpanumpa sa katungdanan maoy gilatid ang ilang mga kaakohan nga pagahimoon ug pagatumanon nga gipasandig sa gilatid nga mga lagda ug ang pagsukwahi niini usa ka dakung kalapasan.

Ang mga batid ug manggialamon maoy naghan-ay sa mga lagda nga gipahaum usab nila sa gilatid sa napulo ka sugo sa atong Labaw nga Makagagahom nga ang katuyoan mao ang pagpatigbabaw sa kahapsay ug katarong. Dugang pa nila nga sa atong mga opisyal sa kagamhanan nga naghupot sa katungdanan maoy atong makita ang duha nila ka mga kinaiya nga naglakip niini mao ang pagtuman o ang pagsukwahi niini nga mosangko ngadto sa kontrobersiya.

Matud pa nila nga kini karon ang matang sa kinaiya nga gihuptan sa atong mga magbabalaod sa nagpadayon nga pagtuki sa RH Bill nga gitawag og Reproductive Health Bill nga ang paghingpit nga balaod kusganong gisupak sa atong kaparian.

Ang pagsupak sa atong kaparian sa RH Bill ilang gipasukad sa napulo ka sugo sa atong Labaw nga Makagagahom nga ang usa sa napulo ka sugo sa Ginoo mao ang dili pagpatay o pagkutlo sa kinabuhi sa atong isigkatawo. Hinuon sa nagpadayon nilang pagtuki maoy atong natataw nga nabahin ilang baroganan sa atong mga magbabalaod tungod kay adunay nagsuporta sa baroganan sa atong kaparian ug ang pipila kanila mipadayag usab sa pagpaluyo sa RH Bill.

Sa duha ka matang sa baroganan sa atong mga magbabalod kinsa man kaha kanila ang labing haum nga molitok sa naghinapos nga mga pulong nga nagkanayon…”So, help me God!” nga maoy panapos nga mga pulong sa panahon sa ilang pagpanumpa sa katungdanan. (Romeo T. Limpangog)