Tinaan, Naga City, Cebu—Upat ka tuig ang nilabay, dihang gipalit sa Kapitolyo sa Sugbo ang 25 ka ektarya nga luna gikan sa banay’ng Balili dinhi, ang labing dakong bahin sa luna (20 ka ektarya) nahimutang sa ilawom sa dagat. Mao ni hinungdan, di ang iyang gipahibawo nga plano pagdagan pagka senador, nga nag-atubang og mga kasong pagpangawkaw sa Sandiganbayan si Gobernador Gwen Garcia.
Maong hinaot nga makasabot ka sa dako namong kakugang pagkakita nga ang kaniadto dagat yuta na karon. Giabunohan na og anapog ang lapad nga dagat ug pagatpatan. Nagtuo ba si Garcia nga dungan sa iyang pagtabon sa dagat matabonan sab ang iyang mga kaso?
* * *
Ang lapad ug paspas nga pagtabon og anapog sa dagat sa Balili property napanid-an sa mga molupyo dinhi nga gisugdan sa Marso pa ning tuiga. Tanang adlaw sa niaging lima ka buwan silang gihasol sa higanteng mga trak nga nagsud-gawas sa kontrobersiyal nga luna paghakot sa anapog.
Nabalaka ang mga molupyo sa Sityo Nangka sa Barangay Inuboran, kilid gyud sa Balili property, nga mameligro ang ilang mga kinabuhi ug kabalayan ug kabtangan. Kay ang mga bawod nga nababagan na sa nagbuntaog nga anapog mahimong mosimang ug mobanlas nila kun dako mas mudako kay sa naandan ang taob sa dagat.
* * *
Gilaktawan ni Garcia ang Cebu Provincial Board (PB) sa pagpatuman sa reclamation project. Nahibaw-an ni Bise Gobernador Agnes Magpale, presiding officer sa PB, nga P27 milyones nga gasto sa proyekto. Matud ni Magpale nga ang WTG Construction ang orihinal nga nakadaog sa subasta, apan gikatahong nisibog ug gipulihan og laing kontraktor. Gisukwahi ni Magpale ug sa mayoriya sa mga sakop sa PB ang baruganan ni Garcia nga di na sila kinahanglan nga mananghid sa bay balaoranan sa lalawigan kay ang gahin gikuha ra man gikan sa budget sa site development. Apan way nahimo silang Magpale ug kaubanan pagbabag sa proyekto.
* * *
Determinado gyud tingaling liderato sa Kapitolyo pagtago sa reclamation project sa Balili property kay gipugngan mi sa ilang mga guwardiya bisan sa paglili sa nagpadayong pag-abuno ug pagpatag ug pagpabantok sa anapog gikan sa silingang mga luna. Ambot unsay nasud sa ilang hunahuna nga di man mahimong taguon ang luna gikan sa duha ka kilid sa Inuboran ug Tinaan ug sa dagat sa atubangan. Katabonan lang tingaling luna gikan sa himantayong mga silingan kun maghimo ang Kapitolyo og higanteng trapal. Apan mabantang gihapon gikan sa ibabaw kun magpalupad ang ABS-CBN sa iyang Sky Patrol. Mas maayo tingali nga dawaton na lang ni Garcia ang kamatuoran nga, samtang nagkapupos nang iyang termino ug nagkaduol ang unom ngadto sa siyam ka buwan niyang suspenso, nagkanihit ang mga dapit ug mga transaksiyon nga iyang katagoan.
* * *
Email: leo_lastimosa@abs-cbn.com