EDITORYAL - Mga minahan wa magbayad og hustong buhis

Maayo kay gibutyag kini sa International Monetary Fund (IMF) aron may hustong giya ang taga BIR sa paggukod niining maong mga magbubuhis.

Kay basin wa kaayo masayud ang BIR niini busa wa sila magpakabana sa pagsuta sa sistema sa pagbayad sa mga namatigayon og mina dinhi sa nasud.

Sa mining industry nagkalainlaing minahan ang nagdagan dinhi sa nasud.

May mina sa gold, copper, carbon , coal ug daghan pa kaayo nga malagmit di na makaapas ang taga BIR sa pagsuta sa paagi sa pagbayad sa mga nagpadagan og minahan sa ilang buhis ngadto sa goberno.

Kay kun tinuod ning nadiskubrehan sa IMF, aw maingon nato nga ang gihimong gatasan sa goberno sa buhis ug tarong kaayo mobayad og buhis way lain kundi ang mga nangimpleyo ra sa goberno ug sa pribadong pamatigayon.

Kay di man sa pag-unsa gawas sa maong matang industriya daghan pa man usab kaayong mga indibidwal dinhi sa atong nasud nga di gyud magtinarong og bayad og buhis ba.

Sama sa mga abogado, doktor , engineer ug uban pang propesyonal nga daghan kaayo silang kinitaan nga gikan sa kaugalingon nilang paagi sa panguwarta nga way resibo busa wa sila magbayad og hustong buhis sa goberno.

Mao nga ingon na lang niini kanunay ang atong kahimtang tungod kay kutob sa mahimo iya-iya og paningkamot ang mga negosyante nga makalikay sa pagbayad og buhis. Busa   kun kuwentahon  nato pag-ayo ang mga pobre nga palaanak mao gyuy maalaot pag-ayo kay di man maapas sa goberno ang pagsalbar kanila pirme kay kuwang baya kanunay ang kuwarta sa goberno sa pagpakaon sa mga kabus.

Kun ang tanang magbubuhis sama sa mga empleyado kaantigo maikog sa goberno ug di molihay-lihay sa bayranan sa buhis, aw abunda unta kaayo ang panudlanan sa goberno matag karon ug unya nga may ikagasto sa pagsulbad sa grabing baha sa panahon sa ting-uwan dinhi sa Cebu City.