JaywalkersMakalagot g’yud tinuod kun dunay mga tawo nga molabang sa karsada bisan og “Go” pa ang signal alang sa mga sakyanan.
Kadaghan ko niini makasugat nga maghimbay-himbay pa sa paglakaw ang molabang nga mora ba og sila maoy nakatag-iya sa karsada.
Ang karsada alang sa tanan kay gihimo kini gikan sa kwarta nga gikuha sa buhis sa katawhan, apan kinahanglang motuman ta sa lagda.
Dunay mga traffic lights diha nga gibutang sa mga eskena aron maoy sundon sa mga drayber, ug aduna sa’y pedestrian lights nga gipahiluna aron mogiya sa mga tawo kun kanus-a sila angay’ng molabang.
Aw bisan pa og wala kining maong pedestrian lights, siyaro og wala kamo makasabot nga dili pa mahimong motabok kay “go” pa alang sa mga sakyanan? Kun maligsan kamo sa inyong paglabang, dili kaha kamo magpabayad?
Mao kini ang isyu karon. Dunay suwat nga nadawat didto sa City Hall nga gipaagi kang Konsehal Margarita “Margot” Osmeña nga gipadala sa usa ka babaye nga nagpaila sa ngalang Marissa Gonzales.
Duna man usab siya’y baruganan sa paghangyo nga dili na lang pamultahon ang mga tinun-an nga madakpan sa pagpataka og labang sa karsada, ilabi na diha sa downtown areas.
Nakabantay man gud kuno si Marissa nga dunay mga higayon nga ang tinun-an nga madakpan sa mga sakop sa anti-jaywalking teams, dili makabayad sa tag P50 nga multahan.
Ang resulta, motunol na lang sila og P20 og usahay P30, dayon mosirit lang sa paglakaw. Ang kwarta, matud ni Marissa, adto ra mahipunta sa bulsa sa mga enforcers.
Motoo gayud ko niining obserbasyon ni Marissa. Kaniadto, duna ko’y gihimo nga imbistigasyon kabahin niining maong isyu diha nga ang multa sa jaywalking tag P20 pa.
Kaniadto dunay usa ka sakop sa anti-jaywalking team nga gipasanginlan nga mobulsa ra sa ubang bayad, dili niya resibohan. Gipakalitan nako og interview ang mao nga sakop sa anti-jaywalking team ug gitan-aw ang iyang stub.
Dihang gipangutana nako kun nganong wala niya resibohi ang mireklamo nako, dali kaayo nakakita’g rason. Gipakita ko niya sa resibo nga diha sa unang pahina nga gibutangan og Mr. X.
Gihiling nako ang iyang gibitbit nga stub sa mga resibo. Duna say gisuwat nga Miss X. Mao diay, ingon niini ang sitwasyon. Ang bilyako mobulsa sa ibayad niadtong mga tawo nga di na modemanda og resibo.
Kun dunay mangutana nganong wala niya isyuhi og resibo ang tawo, sayon ra kaayo ang pag-ingon nga giandam na niya ang resibo nga dunay Mr. X apan midagan ang tawo nga iyang nadakpan. Apan pila kaha ka Mr. X ug Miss X nga madakpan sa usa ka adlaw nga mabulsa ra ang ilang ibayad?
* * *
Paminaw nako, grabe ang kahiubos sa mga konsehal nga ang mga kapitan sa barangay gipalitan og bag-o nga mga sakyanan ni Mayor Michael Rama unya sila nga mga konsehal, daan ang ilang sakyanan.
Nasayud ko nga ang uban maghilom-hilom lang apan sa ilawom sa ilang dughan, nagpahipi ang kahiubos ngadto sa mayor. Sa gihimo ni Mayor Rama, mosamot nga wala sila’y maayo nga relasyon sa kinabag-ang konsehal.
Kun ako pa ang mayor, palitan nako og bag-o nga sakyanan ang mga konsehal unya ang daan nila nga sakyanan, nga nindot lang gihapon, maoy ipagamit sa mga kapitan.