Pagkadaghan nang mga mayor ug konsehal nga nagyaka ning siyudad sa daghang katuigan nga nanglabay apan karon pa sila makaamgo nga ang paghimong libre sa electricity permit mahinungdanon kaayo.
Karon pa sila nakaamgo nga ang pagpig-ot ug subrang ka estrikto nga ang di pag-estalar sa usa ka balay og kuryente tungod kay way permit makatampo diay sa sunog ug di na maihap kun pila na ka balay ang gilamoy sa kayo gumikan sa illegal electrical connection dinhi sa siyudad.
Nganong nahimong ilegal, tungod kay ang mga kabus intawon nga molupyo mapugos sa pagpangabit og kuryente sa balay nga may enstalasyon kay di sila hatagan og permit tungod kay ang ilang balay walay plano.
Di lang plano nga dinato kundi plano kun asa ikutay ang kuryente sulod sa balay nga payag, usa ka butang nga elementarya ra kaayo sa mga electrician.
Karon wa nato sawaya ang mga kasamtangang opisyal nga nakaamgo niini apan ang atong gisaway mao ang mga opisyal kaniadto buhi pa man o patay na nga wa makahunahuna niini.
Ang tinuod ang pagpasuga sa matag balay maoy usa ka serbisyo nga batakan nga angay'ng di ihikaw sa kagamhanan ngadto sa publiko.
Tungod kay usa kini sa batakang panginahanglan sa tawo nga sama sa tubig ug pagkaon nga sa panahon nga imo kining ihikaw sa tawo , di ka pro-tawo o maki-tawo.
Kay ang tinuod di baya ang mayor ug mga konsehal maoy mopas-an sa bayranan sa kuryente sa mga molupyo kundi sila mismong tagbalay maoy mobayad niini.
Wa usay labad sa ulo ni kinsa mang opisyal sa goberno ang pagpasingil sa bayranan sa kuryente sa matag panimalay kay anaa man ang VECO.
Kining maong kompaniya maoy magbuot kun sug-an pa ba ang balay nga wala kabayad sa iyang bayranan sa kuryente o di
Busa angay daygon ang kasamtangang mga opisyal sa goberno ning dakbayan nga nakaamgo nga sayop diay ang karaan nang balaod ning siyudad nga ang mga balay nga gagmay di isyuhan og permiso aron makasuga kay ang maong matang balaod hinakog ug di pro-tawo.