Sakit ang latus sa kinaiyahan

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Ang kayutaan, kadagatan ug ang tanan nga mga butang nga nahimutang niini giisip nga labing bililhon nga butang sa kinaiyahan nga maoy hinungdan nga higpit kining gipanalipdan sa atong kagamhanan.

Daghan sa mga manggialamon ang nag-ingon nga ang mga kahoy nga nagbarog sa kayutaan ug ang kalanggaman nga nagpuyo niini maoy nagsilbing dayandayan nga naghatag og katahom sa atong kabukiran.

Susama usab ang kahimtang sa atong kadagatan nga ang mga isda ug ang mga gasang nga gihimong pinuy-anan mao usab ang nagsilbing dayandayan nga naghatag og katahom sa atong kadagatan.

Gitataw sa mga manggialamon nga kining maong mga butang sa kinaiyahan dili kini mahimo sa kamot sa ordinaryo lamang nga mga tawo sanglit wala man kini kalainan sa hangin, adlaw ug ang ulan nga ilang giingon nga mugna sa atong Labaw nga Makagagahom.

Dugang pa nila nga ang maong mga butang sa kinaiyahan nga gituyo sa paggama sa atong Labaw nga Makagagahom sanglit dako man kini og kapuslanan alang sa pagpakabuhi sa tawo apan mao usab kini ang magsilbing latus sa matag higayon nga gisupak na ang gilatid nga kabubut-on niini.

Gipasabot nila nga ang paglatus maoy magsilbing pagpahiamgo lamang niadtong nakahimo og kalapasan nga ang tumong mao ang pagtul-id sa nahiwi nga binuhatan. Kun ang bagyo o pagbaha nga nahitabo karon sa kinatibuk-ang bahin sa Luzon maoy nagsilbing latus sa atong Labaw nga Makagagahom buot ba natong sabton nga adunay dakong kalambigitan niini ang tinguha sa atong kagamhanan sa pagpalabang sa RH Bill nga hugtanong gisupak sa atong kaparian.

Sa nahitabo karon didto sa kaulohan daw daghan gayod ang gibati og katingala tungod kay samtang gituki sa atong mga magbabalaod ang RH Bill sulagma man usab nga giigo ang maong dapit sa grabeng pagbunok sa ulan nga nakamugna og grabeng pagbaha.   

Matud pa nila nga ang maong kahimtang karon sa kaulohan angayan baya nga hinuktokan sa atong mga opisyal sa kagamhanan nga nagsuporta sa House Bill 4244 kon Reproductive Health Bill tungod kay maisip man nga sakit ang latus sa kinaiyahan.