Unsa ka gamhanan ang simbahan

Karong adlawa hukman sa mga kongresista kun undangon na ba nila ang lantugi ug ang pagpalabang sa kontrobersiyal nga Reproductive Health Bill. Dinhi atong masayran kun unsa gayod ka gamhanan ang simbahang katoliko.

Sa akong tulomanong Saksi Evening Edition sa DySS Super Radyo Cebu gipahibalo ni Dr. RJ Bullecer, Country Director sa Human Life International usa ka Church affiliated organization nga sa 220 ka mga kongresista sa ubos balay balauranan 170 na kanila ang merehistro sa pagsupak sa Reproductive Health Bill.

Sa Senado dili kuno problema ang simbahan tungod kay pila lang ka buok ang senador nga mipadayag sa ilang pag-uyon sa Reproductive Health Bill. Apan bisan pa man niini dili gihapon sila mokompyansa ug padayon nilang tutokan ang kalihokan sa mga magbabalaud sa kongreso sa Pilipinas.

Karon atong masayran kun unsa gayod ka gamhanan ang simbahang katoliko ug ang mamahimong sukdanan sa iyang pagka gamhanan mao ang Reproductive Health Bill nga iyang gipakigbatokan sukad pa sa sinugdanan.

Ang mga tigtan-aw miingon nga walay catholic votes tungod kay ang simbahang katoliko dili sama sa ubang relihiyon nga modiktar sa ilang mga miyembro kun si kinsa ang kandidatong botaran. Karong adlawa atong masayran kun tinood ba ang ilang giingon nga walay catholic votes. Kun sa botasyon unya sa mga magbabalaud makalusot ang Reproductive Health Bill, tinuod gyod nga walay catholic votes pero kun dili kini makalusot, dako diay silang sayop.

Sa laing bahin Ang Section 30 sa Reproductive Health Bill nagtugot sa nasudnong kagamhanan sa pagpalit og condoms, pills ug uban pang mga contraceptives sa kantidad nga tulo ka bilyon matag tuig busa ang nahisgotang balaudnon magwaldas lamang sa salapi sa nasud kay labing seguro ang mga condoms, pills ug uban pang mga contraceptives mangalata lang sa bodega sa atong gobyerno tungod kay gamay lang ang mogamit niini. Gani akong gituohan nga kun aduna may mogamit og condoms dili kini gamiton sa pagpakighilawas kun dili himoon lamang kining balloons.