Pulos mga mahinungdanon apan sa isyu bahin sa road widening diin apektado ang mga karaan nga punoan sa Acasia, asa may hatagan og dakong pagtagad sa goberno, ang pagpalapad sa karsada o ang pagpamuril sa maong mga Acasia.
Ang gikagubtang isyu nahimutang sa habagatan nga apektado sa road widening project sa kagamhanan.
Sa karsada nga palapdan, daghan ang suliran nga masulbad sama sa kahuot sa dagan sa trapiko ug ang ka-risgo sa kinabuhi sa maong lugar
Apan kundi palapdan ang maong karsada nga nahimutangan sa tagsa na ka gatos ka tuig kapin nga mga punoan sa Acasia tungod lagi kay mahinungdanon ang pagpabilin niining magbarug sa daplin sa karsada, masiguro kaha nga walay risgo sa kinabuhi sa tawo ang pagpabilin sa maong mga kahoy sa maong lugar?
Daghan na ang mga hitabo nga may labot sa kamatayon sa tawo nga nadat-ogan sa mga dagkong punoan o kaha mga sanga sa dagkong kahoy nga nabali o naputol gumikan sa kusog nga hangin.
Sa lugar nga gibarogan niining karaan na kaayong mga Acasia nga gipugngan sa pipila ka mga molupyo nga di ipapuril, may mosagang ba sa mga punoan sa maong mga kahoy kun matumba kini?
May mosawo kaha sa iyang mga sanga nga mabali di lamang sa kusog nga hangin kundi sa iya nang katiguwangon?
Busa kun imong sumadahon, asa man diay ang peligro, ang pagpuril sa maong mga kahoy aron kapalapdan ang karsada o ang di pagpuril niini? Kun imong purilon ang maong mga kahoy, maglakaw ka o kaha magsakay og sakyanan sa maong dapit wa kay angay kabalak-an sa imong kinabuhi kay gawas nga hawan, halapad na unya ang dalan.
Samtang kun magpabilin ang maong mga Acasia, inig-agi nimo sa maong lugar kun magabii ang imong kabalak-an mao ang mga hamok o kanang giingon sa uban nga di ingon nato. Apan ang labing kuyaw sa maong lugar mao ang sa panahon nga adunay bagyo, sa usa lang ka sanga niana nga murag bukton sa bata kun matagak ug maigo ka, lupig pa nimoy gihabas sa bara de kabra.
Apan kun delikado ang usa lang ka sanga nga matagak kanimo, daw unsa kaha ka peligro kun mismo ang punoan na sa maong mga kahoy maoy mosantako kanimo?