Pamolitika sa pork barrel

Anaa kunoy negosasyon alang sa pagtukod og koalisyon tali sa Liberal Party (LP) ni Pres. Aquino ug United Nationalist Alliance (UNA) nila ni Vice Pres. Jejomar Binay, Senate Pres. Juan Ponce Enrile ug kanhi presidente Joseph Estrada. Buot nila kining tawgon og super coalition.

Dili ko kasabut niining maong lakang sa mga lideres sa duha ka partido. Kun mahinayon gud kini daghang mga buot mokandidato sa duha ka partido wala nay kahigayunan nga makalansar sa pagka-senador. Sa gipahibawo na sa duha ka habig mokapin na sa 20 ka mga senatoriables ang anaa sa ilang mga listahan. Unya 12 ra man ang pilion pagka-senador sa eleksiyon sa 2013 mahiubos gayud kining uban? Unsa na man lang ang koalisyon sa LP, Nacionalista Party (NP) ug sa Nationalist Peoples Coalition (NPC)?

Makapabor niining maong koalisyon, kay madugangan man og 12 ka mga senador, ang Aquino administration hangtud sa katapusan sa iyang termino sa 2016. Pero dili kini makapalig-on sa presidential candidacy ni Binay kay kutob ra man kining maong koalisyon sa 2013 nga piniliay hinunoa ang mga dili madala sa UNA niining umaabot nga eleksiyon magbaton og kahiubos kaniya.

* * *

Di na ikahibulong nga ang administrasyon dili mo-release sa pork barrel aron pagpiang sa ilang mga kaatbang sa politika. Gihimo kini sa tanang nangaging presidente. Mao usab kini ang gihimo sa mga pangulo sa local government units (LGUs) diin magpuasa ang mga sakop sa kaatbang nga partido.

Mireklamo man gud si Kong. Mitos Magsaysay nga duha na kuno ka tuig nga wala siya makadawat sa iyang pork barrel niining Aquino administration. Apan daghang mga kongresista ug mga senador, apil na si Sen. Chiz Escudero, nga wala mahatagi sa ilang pork barrel sa administrasyon ni Pres. Arroyo. Sumala pa sa napagya na nga panultihon "weather, weather lang."

* * *

Gisaway ni Pres. Aquino si kanhi bise presidente ug karon anchor sa TV Patrol Noli de Castro atol mismo sa kasumaran sa maong news program sa telebisyon. Gikuwestiyon sa presidente ang paghimo’g komentaryo kon pag-editorialize ni Kabayan Noli sa mga report sulod sa TV Patrol.

Husto man ang pagsaway ni P.Noy apan nahasupak sa atong kultura nga imong unayon pagsaway ang nagdapit kanimo sa usa ka okasyon. Kinahanglang dili nimo sagulan og komentaryo kon opinyon ang imong basahon nga balita aron dili maglibug ang mga maminaw ug manan-aw kun unsay lonlon balita. Taboo kon gidili kini apan daw mao na man gud kini ang naandan karon dinhi sa Pilipinas.

Apan nagtoo ako nga mireklamo lang ang presidente kay ang gihimo ni Kabayan Noli kay makadaut man kini sa iyang administrasyon. Nganong wala man lagi niya sawaya si Korina Sanchez nga anchor usab sa TV Patrol nga dili gayud motawag og bise presidente kang Jejomar Binay.

Kining pagpanaway sa usa ka guest speaker sa nagdapit kaniya dili lamang batasan ni P.Noy kondili gihimo usab kini sa usa ka politiko dinhi sa Sugbo. Wala na bay laing okasyon diin mapabati sa usa ka dinapit ang iyang kahiubos ug pagpanaway nga adto man gayud kini ipalanog atubangan sa nagdapit kaniya ug sa mga tawo nga migahin og panahon aron pagselebrar sa talagsaon nga okasyon?

* * *

Kining politika daw makapa-amnesia sa mga politiko. Sama niining pagpanaway ni Konsehal Alvin Dizon sa pagpapahawa sa mga sidewalk vendors sa pipila ka dapit sa Cebu City.

Nakalimot tingali si Dizon sa gihimo sa iyang amo pagpatid sa usa ka namaligya'g barbecue sa aseras ug ang pagpapahawa niini sa mga namaligya og mga "santos" sa atubangan sa Basilica Minore del Santo Niño. Dili ba mas grabe kini? Konsehal, mao ba kini ang gitawag nga canine loyalty nga sama sa itoy pirmi kang motila sa tiil sa imong amo?

* * *

Email: [email protected].