Ang paborito kong atleta

Duha ra ka miyembro sa atong London Olympic Team ang akong gigastuan og oras sa paghuwat sa ilang turno adtong Martes sa gabii -- si boxer Mark Anthony Barriga ug weightlifter Hidilyn Diaz.

* * *

Nalipay ako sa pagdaug si Mark Anthony batok sa taason nga Italyano nga si Manuel Cappai. Mao toy dauga nga klarong daug gyud. Walay makalalis kay ang score 17-7 pabor ni Barriga.

* * *

Wa makadaug si Hidilyn Diaz apan nalipay gihapon ako kay mipakita’g maayong performance sa duha ka higayon nga iyang gialsa ang barbell sa dakong kasayon. Diha na lang siya napakyas sa ikatulo niyang alsa nga mao na untay padung sa medalya.

* * *

Mihilak si Hidilyn tungod kay napakyas siya sa paghatag og kadungganan sa nasud. Apan para kanako dili angay ikauwaw ang maong kapakyasan tungod kay klaro man kaayo ang iyang pagpaninguha nga makamedalya alang sa Pilipinas.

* * *

Bata pa man si Hidilyn, 21 anyos pa, duna pay higayon nga makab-ot niya ang iyang tinguha nga makamedalya sa sunod nga Olympics sa Rio. Ug kun dili sa Olympics naa pay laing international competition lakip na ang Asian Games.

* * *

Gani matud ni Hidilyn hunongan gayud niya ang pag-eskuwela aron lang makadedikar sa iyang pag-praktis og bansay-bansay.

* * *

Sa pagsuwat niini, si Mark Anthony Barriga nakatakda pang moaway sa ikaduha niyang away alang sa light flyweight nga korona. Masaligon ang mga tigpaniid nga magmalampuson gihapon si Mark.

* * *

TRIVIA. Maayong buntag sa atong mga higala diha sa mga dan Calderon ug Progreso. Salamat sa inyong suporta sa Banat News.