Ang mga nagpakabanang molupyo sa dakbayan sa Toledo nangreklamo sa giingong pagkuyanap og maayo sa drugas sa ilang dakbayan. Ang mga nagpakabanang molupyo mipadala na og suwat ngadto sa hepe sa kapolisan sa probinsiya nga si Sr. Supt. Patrocinio Comendador kalabot niini.
Matud sa mga nagpakabanang molupyo nga nabalaka sila sa ilang mga anak nga madisgrasya sa maong bisyo kun dili masanta sa kapolisan ang maong illegal nga negosyo.
Ang kapolisan sa dakbayan sa Toledo giingong nagpakabuta bungol sa maong suliran tungod kay matud pa pipila nila nagdawat og protection money gikan sa giilang drug lord sa ilang dapit.
Gawas niini usa ka dakong opisyal sa kapolisan dinhi sa rehiyon ang giingong nagsilbi sab nga protektor niini. Gani usa ka opisyal nga mihangyo nga dili magpaila mitug-an nga na-demoralize sila sa paghimo og kampanya batok sa illegal nga drugas tungod kay matag higayon nga duna silay operasyon ipatawag dayon sila og kuti-kutihon.
Matud sa maong opisyal nga lupig pa kuno nilay gisalang sa congressional investigation sa pagpanubag sa daghang pagsukit-sukit sa maong dakong opisyal. Sumala pa nga daghan sa iyang mga kaubang mga opisyal dili na ganahan nga mokampanya batok sa drugas tungod sa kabalaka nga sukit-sukiton ug kun demalason malagpot ug madistino sa layong dapit. Sumala pa sa reklamo sa mga nagpakabanang molupyo sa Toledo nga ang druglord sa ilang dapit usa ka retiradong sakop sa kapolisan dinhi sa Sugbo. Ang maong retiradong polis kontrobersiyal sab niadtong diha pa siya sa serbisyo.
Gani gipasakaan siya kaniadto og kaso sa Ombudsman tungod sa pasangil nga ilang gikawat ang sakyanan sa ilang dinakpan nga usa ka gidudahang sakop sa Hongkong drug triad.
Gawas sa drugas ang maong retiradong polis giingong nagpaluyo sab sa illegal swertres sa dakbayan sa Toledo. Nangindahay ang mga molupyo sa Toledo nga hatagan og dinaliang pagtagad sa kadagkuan sa kapolisan sa probinsiya ang maong suliran.
* * *
Ang Regional Trial Court didto sa Pasay City nga si Jesus Mupas mitugot ni kanhi presidente Gloria Macapagal Arroyo nga makapiyansa sa kasong electoral sabotage. Kini human sa iyang pagdungog sa petition for bail nga giduso sa mga abogado sa kanhi presidente.
Matud ni Mupas nga huyang ang mga ebidensiya batok ni Arroyo hinungdan nga iyang gitugot nga makabutang og usa ka milyon ka pisos nga piyansa si Arroyo alang sa iyang temporaryong kagawasan. Niining pagtugot sa korte nga makapiyansa si Arroyo nagpasabot ni nga himatyon na sab ang kaso batok kaniya. Kun dili makakuha og bag-ong mga ebidensiya ang prosecution batok ni Arroyo nahibawo na ta nga mopaingon gyud sa pagkaabswelto si Arroyo niining maong pasangil.
Duna pa hinuoy laing kaso nga posibling makapabanlod niya pagbalik sa prisohan. Kini mao ang nag-ung-ong nga kasong plunder didto sa Sandiganbayan tungod sa giingong misuse sa PAGCOR funds.
Gani usa ka adlaw human makapiyansa si Arroyo miawhag dayon ang Ombudsman sa anti-graft court nga moluwat og warrant of arrest batok niini. Ang motion sa Ombudsman wala ma-resolve sa korte apan dili imposible nga kini itugot.
* * **