EDITORYAL - Ang ika-98 nga anibersaryo sa INC

Karong adlawa , usa ka makasaysayanong adlaw ug petsa alang sa mga membro sa Iglesia ni Cristo (INC) tungod kay mao kini ang petsa sa buwan sa Hulyo 1914 nga narehistro sa Securities and  Exchange Commission ang maong relihiyon.

Gikan sa relihiyong namat-an ug kahayag sa tanang mga Filipino, ang nakasulod sa INC nahisama sa tawong hinigarilyo nga nakalingkawas gikan sa iyang pagka-hinigarilyo.

Kay sa pagkatinuod lisud kaayo biyaan ang bisyo nga hinigarilyo nga bisan kun makadaot kini sa lawas sa tawo gimahal kini sa nagumon sa maong bisyo, ug sama usab niini kalisud biyaan ang relihiyong midominar sa kalibotan karon.

Busa matag moabot kining adlawa, ang matag membro sa INC malipayon tungod kay samtang nag-anam kaguwang ang katuigan niining maong pundok, nag-anam usab kaduol ang ilang gilauman ug gipaabot nga mahinangpon nga mao ang pagbalik ni Kristo.

Mao kini ang labing bililhong tuyo sa usa ka tawo nganong nagpa-membro siya sa INC kay nasuta niya unsa diay mahitabo sa kalibotan inigbalik ni Kristo.

Sa samang higayon, angay baya usab nga magpasalamat ang kagamhanan sa nasud ug ang tanang mga Filipino nga gawas sa INC may lain pang natukod nga mga relihiyon dinhi sa nasud nga nakatibhang og dyutay sa kriminalidad sa palibot.

Bisan nagpabiling minoridad ang INC ug uban pang gagmay nga relihiyon dinhi, apan nakadaginot usab kini og pipila ka porsento sa mga tawong tigpasiugda og krimen dinhi sa nasud.

Kay kun ang tanang tawo sa Pilipinas pulos pa membro sa usa ka relihiyon nga modominar dinhi, di baya tingale lalim ang pag-atiman sa kalinaw ug kahusay sa nasud.

Kini tungod kay ang INC may kaugalingong pagdumala nga maoy mopatuman og disiplinang tinarong sa iyang mga membro ug kadtong di mosanong sa maong disiplina isalibay gihapon balik ngadto sa relihiyong namat-an og kahayag sa tanan.

Sa pagkakaron mikaylap sa nasud ang nagkalainlaing   krimen gumikan sa illegal nga drugas.

Bunga niini sa matag prisohan sa nasud   sayon ra kaayo natong maimbentaryo ang klase ug matang sa relihiyon sa mga tawo nga nasulod niini . Di ba?