Kun ang pobre nga magtiayon ang magbuwag, di na modangop sa Korte kondili magpirmahanay na lang og kasabutan nga di na sila maghilabtanay. Apan ang dakong pangutana kun balido ba ang maong kasabutan? Kana nga pangutana ang atong tubagon ning atong column.
Dear Atty. Divine,
Usa ko sa mga suki sa Banat News ug salamat sa imong column nga aduna mi makonsulta sa among mga problema. Atty, buwag ko sa akong bana sud na sa napulo ka tuig. Ang akong kanhi bana aduna nay laing pamilya ug ako aduna na say laing live-in partner ug plano na namo nga magpakasal. Kasado mi sa akong kanhi bana apan sa dihang kami nagbuwag, nagpirmahanay mi og kasabutan nga di na mi maghilabtanay kun unsay gusto namong buhaton sa among kinabuhi. Ang akong pangutana karon Atty kun libre na ba akong magpakasal og lain? Balido ba ug magamit ba nako ang among gipirmahan nga di na maghilabtanay sa akong ex-husband? Palihug tambagi ko Atty kay naglibog ko kun unsay akong buhaton. — Joy
Dear Joy,
Salamat sa imong pagsunod sa Banat News. Bisan kun nagpirmahanay na mo sa imong ex-husband nga di na mo maghilabtanay sa usa’g-usa apan kanang maong kasabutan di kana balido ug wa kana makaputol sa inyong kaminyoon. Sa mata sa balaod, kamong duha nagpabiling magtiayon kay ang atong Korte ra ang mamahimong mobugto sa atong kaminyuon. Sa ato pa, di pa ka mamahimong magpakasal tungod kay usa sa mga rekisitos sa pagkuha og marriage license mao ang certificate of no marriage sa NSO ug tungod kay naminyo ka kaniadto nagpabilin ang maong record sa National Statistics Office. Kun ang usa ka tawo nga kasado na, unya magminyo pag-usab samtang nag-exist pa ug wa pa maputol ang iyang unang kaminyuon mamahimo kang mapasakaan og kasong Bigamy. Ang maayo nimong buhaton kun gusto gyud ka nga magminyo pag-usab mao ang pagpa-annul daan sa imong kaminyoon sa imong ex-husband. Mamahimo ka nga mokunsulta og abogado aron iyang matun-an kun aduna bay basihan nga ipa-annul ang imong unang kaminyoon. Kun ang korte mo-annul na sa imong kaminyoon ug matatak na ang maong desisyon ngadto sa Civil Registrar ug sa NSO then that’s the time nga mamahimo ka na nga magminyo pag-usab.
Dili sayon ang pagpa-annul sa kaminyoon. Kini tungod kay ang Marriage gikonsiderar kini nga sagrado ug ang atong gobiyerno kinahanglan gyud nga modepensa niini kay maoy mando sa atong balaod. Busa warning na ni sa atong mga dalaga ug ulitawo nga dili basta-basta nga mosud sa altar sa kaminyoon kun dili pa andam kay sa matag magtiayon nga magbuwag adunay mga anak nga masakitan.
Alang sa inyong pangutana, ipadala lang sa Legal Corner sa Banat News og email sa flores_divina@yahoo.com