Ang piit-piit nga karsones

Ang mga eskperto didto sa Amerika gikutlo sa media nga nag-ingon nga ang tight-fitting jeans kon mga karsones nga huot kaayo makadaut sa panglawas labi na sa mga lalaki nga nagsul-ob niini.

* * *

Ang labing grabe nga kadaut sa panglawas sa mga lalaki mao kuno ang “twisted testicles” diin makamugna sab og laing mga sakit sa kalawasan.

* * *

Unsa man ning “twisted testicles”? Ang labing simpleng hubad niini sa binisaya mao ang itlog sa lalaki. Busa walay kuyaw sa maong problema ang mga babaye.

* * *

Matud pa sa mga eksperto, naa ra sa mga lalaki ang paghatag og importansiya sa ilang pahimatngon. “If you want style before your health, it’s up to you,” one expert said.

* * *

Gihisgutan kining maong problema sa mga lalaki tungod kay niining panahuna daghang lalaki ang ganahan mosul-ob og tight-fitting jeans (maong) bisan usahay maglisud na gani sila pagginhawa ug pagpangihi.

* * *

Misunod man gud sila sa fashion o urog nga kaniadto mga babaye ra man ang magpapiting-piting sa ilang karsones aron makita ang porma sa lawas.

* * *

Karon kay nabutyag na ang kadaut nga mahimo sa kalawasan sa kalalakin-an ambot kun moinsister pa gyud si Dodong sa pagsul-ob og tight-fitting trousers.

* * *

TRIVIA. Maayong buntag sa atong mga higala diha sa Freedom Park ug sa South Bus Terminal. Salamat sa inyong suporta sa Banat News.