Importante kwarta dili koalisyon

Sumala ni kanhi national security adviser ug two-time chief of staff sa armadong kusog sa nasud Norberto Gonzales nga midaug si Noynoy Aquino pagka-presidente tungod kay milampos ang iyang mga propagandista sa pagpunting sa ilang atake sa mga anomaliya ug kasaypanan sa Arroyo administration. Napagan ang tanang mga kandidato nga iyang kaatbang.

Wala siya magtoo nga mosangpot sa gubat ang tensiyon sa West Philippine Sea (South China Sea). Nangagpas siya nga gipalagot lamang sa China si P.Noy tungod sa pagpamatay sa Chinese tourist sa Rizal Park nga wala gayud mangayo og pasaylo ang presidente.

Sumala niya nga ang U.S. nga atong gituhuan nga modapig sa Pilipinas niining panahona layo ra sa tinuod. Molaban sila kanato kun aduna nay shooting war kon pinusilay sa duha ka habig. Bisan pa niini, analisahon pa sa U.S. Congress kun unsay kaayuhan sa ilang nasud kun moapil sila sa gubat. Ang buot usab nila nga masayran kun kinsay mobayad kanila sa maong gubat.

Siya mipasabot usab nga lisud molampus ang kudeta kun usa ka faction lamang sa militar ang mopasiugda niini ug dili ang military institution mismo. Nagkinahanglan usab kini og suporta sa katawhan.

Nagbantay hinoon ang ubang mga opisyal sa militar kun unsa ang himoon niining mga walhon nga nag-alirong kang P.Noy. Nahadlok sila nga magbinuang kining maong mga walhon aron mahulog kita sa mga kamot sa komunista.

Si Sec. Gonzales gi-interview niining inyong higala inabagan nila ni Brig. Gen. (retired) ug manlalaban Fritz Quiñanola ug The Freeman daily section editor (nation & world) Johnrey Saavedra sa tulumanon "Clear Cut Tonight" nga makita matag Miyerkules sa alas 9 - 10 sa gabii ug alas 2 -3 sa hapon matag Huwebes sa Cebu Catholic Televison Network International, Inc. (CCTN) channel 47.

Ang ubang mga panahum ni Sec. Gonzales akong mahisgutan sa umaabut nga lindog.

* * *

Daghan nang koalisyon ug panag-alyansa nga gihimo sa nagkalainlaing partido sa nasud. Daghang mga partido ang nakig-abin sa Liberal Party (LP). Apan nganong aduna may mga mayor ug ubang mga kandidato nga wala makahir niini?

Akong nasayran nga ang gikinahanglan sa mga mayor ug ubang mga kandidato mao ang campaign funds. Nagduda sila nga mohatag og salapi si P.Noy ug si LP President Mar Roxas alang sa batakang panginahanglan lamang sa partido sama sa galastuhan alang sa mga inspektor. Ilang gipaabot mao ang dakung kantidad alang sa ilang kampanya. Ang mga kongresista hinoon sigurong makadawat sa ilang pork barrel labi na og naa sa kilid sa LP.

Si Roxas mora’g nabugnaw na sa iyang ambisyon sa pagka-presidente samtang init na kaayo si Bise Pres. Jejomar Binay. Nagtoo usab ako nga mas daghang salapi ang United Nationalist Alliance (UNA) kay mas abtik man kini sila kay sa LP.

Makombinsi kaha ni P.Noy ang mga kandidato pinaagi sa laway lang? Ang laway dili baya makapapilit sa mga poster ug ubang mga campaign materials.

* * *

Nganong mahadlok ug boyboyan man ang mga mayor nga mangayo og proyekto alang sa ilang munisipyo? Dili ba mga 40% man sa internal revenue allotment (IRA) sa mga kalungsuran mapunta man sa Kapitolyo? Kun dili kaalyado sa gobernador ang mayor nganong dili man lang niya iuli ngadto sa lungsod ang ilang nahatag sa Kapitolyo nga bahin sa ilang IRA inay nga paantuson?

* * *

Nakadawat akong upat ka pahinang papel nga nagyagyag sa binuhatan kuno ni Kong. Tomas Osmeña. Grabe kaayo ang mga pasangil nga gihisgutan. Gi-apil kun si kinsa ug unsang buhatan ang tinubdan niini. Nasayud ako nga nakadawat na og kopya si Osmeña niini. Akong paabuton ang iyang tubag kalabut niini kay akong ipatik dinhi ang duha ka habig.

* * *

Email: [email protected]