Kura

Si kanhi senador John Henry “Sonny” Osmeña mitug-an nga andam niyang suportahan ang kandidatura ni Gobernador Gwen Garcia pagka-senador ug sa manghod niini nga si Kongresista Pablo John “PJ” Garcia isip gobernador.

Atol sa interview ni Karen Davila sa ANC ni Gobernador Garcia, giangkon sa gobernador nga si kanhi gobernador Emilio “Lito” Osmeña mipadayag og suporta niya samtang ang igsuon niini nga si Sonny mipadayag sab og kaandam.

Dihang gisukna si Sonny iyang giadmitir nga husto ang gisulti sa gobernador nga andam siya nga mosuporta apan iyang giklaro nga duna siyay kondisyon niini. Giangkon sab ni Sonny nga nagkatagbo na sila ni Gwen didto sa kaulohan pinaagi sa usa ka higala.

Wala pa hinuon sila maghisgot og politika atol sa maong meeting. Sumala pa ni Sonny nga igo lang silang nag”beso-beso” atol sa maong higayon. Si Sonny nakigbeso-beso ni Gwen nga kaniadto labihan niyang kontraha? Laing pruweba nga sa politika wa gyuy permanente gawas sa” personal interest.”

Gilamoy ni Sonny pagbalik dili lang ang iyang kinulipa kun di lakip na ang iyang sinuka tungod sa iyang ambisyon nga makahupot pagbalik og pwesto. Si Sonny gusto nga magmayor sa dakbayan sa Toledo mao nga matud niya iyang suportahan ang mga Garcia bugti sa suporta niini sa iyang kandidatura.

Kondisyon ni Sonny sa iyang suporta ngadto ni Gwen ug ni PJ mao nga manduan niini ang ilang mga lider sa Toledo nga siya maoy paluyohan pagkamayor ug dili si Mayor Aurelio Espinosa o ba kaha ang iyang anak nga si Vice Mayor Arlene Zambo.

Ingon na ba niini ka desperado si Sonny? Iya na bang giangkon nga laos na gyud siya nga ultimo mga kapitan sa barangay wa nay ganahan mosuporta niya? Hain naman ang iyang kaarogante kaniadto nga yano lang moingon sa mga Sugboanon nga “Magpuasa mo”?

Matud ni Sonny nga duna pa siyay network sa tibuok nasud nga magamit niya pagsuporta ni Gwen, kun tinuod nga duna pa siya niini nganong di man siya molansar pagbalik pagkasenador? Sa iyang ka maro, mosugot kaha siya nga lain maoy makabenepisyo sa iyang network kun tinuod man gani nga duna pa siya niini?

Siya na lay mokandidato kun nakasiguro pa siya nga makakuha pa gihapon siya og suporta gikan sa ubang dapit sa nasud. Ako’y naluoy ni Sonny sa iyang gihimo tungod kay sigurado ko nga dili isakripisyo sa mga Garcia ang mga Espinosa ug Zambo sa Toledo tungod ug alang niya. Kini tungod kay kun buhaton ni sa mga Garcia tabla ray ilang gilabay ang piso bugti sa usa ka kura.

Yes, mahulagway na si Sonny Osmeña nga daw sama sa kura nga wa nay bili tungod kay mismo sa iyang kaugalingong balwarte kaniadto wala na man siyay klarong lider gawas lang sa mga Yapha sa Pinamungajan. Posible pa gyud gani nga dili ta makasalig siento porsiento nga mosuporta niya ang mga Yapha.

Dili na sab siya mamahimong mosakay sa Liberal Party kay iya mang giaway ang provincial chairman niini nga si Atty. Hilario “Junjun” Davide III.

* * *

[email protected]