Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.
Gihatag sa kagamhanan sa mga tinun-an ug senior citizen ang 20 porsiyento nga diskuwento sa ilang pagsakay og mga publikong sakyanan sama sa barko, abyon, PUJ, bus ug taxi.
Ang mga senior citizen sa ilang pagpangayo og diskuwento dili na unta angayan nga pangayoan pa sa ilang identification card sanglit makita man kini sa ilang pamayhon, pamarog ug panglihoklihok. Dili sama sa mga tinun-an nga gikinahanglan gayod ang ID sa pagsiguro nga tinun-an gayod ang hingtungdan nga nangayo og diskuwento kay daghan man sa mga batan-on nga wala makapadayon sa ilang pagtungha.
Matud pa nila nga bisan pa sa maong kahimtang sa mga senior citizen ang pipila ka mga drayber, konduktor ug labaw na gayod ang mga botika sa matag higayon sa ilang pagpalit og tambal pangayoan sila sa ilang ID sa dili pa mohatag og diskuwento. Dugang pa nila nga gihatag hinuon sa tanang adlaw nga pagsakay sa mga senior citizen ang diskuwento nga 20 porsiyento sukwahi kini sa mga tinun-an nga dili hatagan sa mga adlaw nga holiday o mga panahon nga walay klase sa ilang pagsakay.
Kini ang hinungdan nga daghan karon sa mga tinun-an ang nag-ingon nga dili makiangayon ang paghatag og diskuwento nga kun buot hunahunaon labaw pa gayod unta sila nga nagkinahanglan sa maong pribilihiyo nga gihatag sa gobiyerno. Gipasabot sa pipila ka mga tinun-an nga pulos sila mga walay trabaho ug nagsalig pa sa ilang ginikanan maoy hinungdan nga angayan usab unta silang hatagan sa maong diskuwento.
Gitataw nila nga adunay mga higayon nga sila mosakay og sakyanan nga naglambigit gihapon sa ilang pagtungha sama sa paghimo sa ilang research o pagtambong sa mga kalihokan sa ilang tulunghaan. Hinuon dili usab kalikayan nga adunay mga higayon nga ang paglakaw mao na lamang ang paglingawlingaw apan dili kini sa tanang higayon.