Salamat sa katawa

Sa edad nga 83, nitaliwan na ang hari sa komedya sa nasud nga si Rodolfo Vera Quizon, Sr. o mas naila sa panga’n nga Dolphy. Su’d sa daghang katuigan sa iyang karera, wa’y laing tumong si Dolphy gawas sa pagpakatawa sa pamilyang Pilipino ug pagtapos sa matag programa nga puno sa mga leksyon ug pagtulun-an sa kinabuhi. Ang kamatayon ni comedy king nahimong dakong kasub-anan sa mga tawo nga nagdako sa iyang klase sa komedya ug nahimong parte sa iyang komplikadong kinabuhi. Adunay unom ka babaye ug 18 ka anak si Dolphy, apan wa’ mahitabo nga adunay sakop sa iyang pamilya nga nagreklamo nga nagkuwang sa pag-atiman o gipasagdan.

Apan nganong natandog ‘ta sa pagpanaw sa usa ka Dolphy nga dili nato igdugo ug wa’ ‘ta personal nga mailhi? Kini tungod sa nindot nga panahon nga puno sa pahiyom ug katawa nga gihatag ni Dolphy. Sa panahon sa grabeng kalisud sa ekonomiya, adunay John en Marsha nga nahimong samin sa kinabuhi sa matag Pilipino.   Luyo sa kakabus, adunay Home Along da Riles nga nahimong simbolo sa usa ka yano apan nagkahiusang pamilya. Sa 300 ka pelikula nga iyang nahimo su’d sa iyang 83 ka tuig ning kalibutana, nagmalampuson si Dolphy sa paghatag og katawa ug niawhag sa mga tawo nga atubangon ang mga pagsuway nga puno sa paglaom ug pahiyom.

Nitaliwan si Dolphy nga wa’ mahatag ang giisip nga labing dakong pasidungog alang sa usa ka artista. Bisan sa mga saludo nga iyang nadawat gikan sa mga tawo ug pagdayeg nga iyang naangkon gikan sa mga kauban sa industriya, nahimong idlas ang National Artist Awards alang sa hari sa komedya. Bisan sa katapusang gininhawa, malaumon ang tanan nga matunol ngadto ni Dolphy ang labing taas nga pasidungog. Karon, nahimong dakong isyu unsa ang tinuod nga kwalipikasyon aron mabutang sa laray sa mga tawo nga giisip nga dakong panga’n sa aspeto sa arte.   Ang usa ka Dolphy, labaw pa nga kwalipikado sa usa ka pasidungog kung basehan ang pagsubo nga gibati sa mga Pilipino karon.

Sagad nga mahatag ang National Artist Awards sa mga tawo nga nakatunol og wa’y kinutuban nga kontribusyon alang sa industriya sa arte. Apan sa pagtaliwan ni Dolphy nga wa’ gihapon makadawat sa labing taas nga pasidungog, mas nabutang sa dakong kwestyon ang integridad sa mga tawo nga nagpasiugda ug nagpaluyo sa maong pasidungog. Kun ang usa ka Dolphy nga wa’ lang motunol og de kalidad nga trabaho sa industriya apan nitandog pa sa kinabuhi sa mga Pilipino su’d sa dugay nga panahon, pakyas nga nakadawat sa labing taas nga pasidungog, mo-kwestyon na ang sagad nato unsang matang sa mga tawo ra diay ang kwalipikado sa maong pasidungog.

Si Dolphy ang nahimong nawong sa matag Juan dela Cruz pinaagi sa iyang mga ‘sitcom’ ug mga salida. Ang iyang katakos sa paghiusa sa pamilya luyo sa pagsuway sa kalisud ug uban pang mga problema, ang nahimong inspirasyon sa matag usa ka nato nga bisan sa mga pagsuway, anaa ang pamilya nga maoy kakuhaan sa kusog ug inspirasyon aron makapadayon sa pagpuyo sa inadlaw-adlaw. 

Di’ man perpekto ang kinabuhi ni Dolphy kinsa adunay daghang mga gikapuyo, apan nahimong inspirasyon sa tanan ang iyang pagtabang sa mga kabus luyo sa kalampusan nga iyang naangkon. 

Usa ka butang nga angay natong kapanaminan nga bisan sa kalampusan sa karera, mas maayong molingi sa kagahapon aron magpasalamat sa mga grasya ug mga katakos nga gihatag. Alang sa mga negosyante ug mga adunahang Pinoy, angayan nga kapanaminan ang kinabuhi sa usa ka Dolphy pinaagi sa pagtabang sa mga nanginahanglan ug pag-aghat sa uban nga maningkamot. 

Kining tanan nga kontribusyon ni Dolphy, labaw pa sa saludo ang atong mahatag ug labaw pa sa idlas nga pasidungog nga haom unta sa iyang pagkatawo.

Email: [email protected] or [email protected]