Kabalaka sa mga retirees

Sa among pagsuroysuroy sa kalungsoran sa lalawigan sa Sugbo, pagka-national president ni Engr. Dodo Abella, sa FSCAP – sa information campaign on the rights and privileges of senior citizens, among nasayran, nga dunay mga retirees nga ang pension P2,000 pa ang buwan, sulod sa dugay nang panahon. Luoya no? Dihay panahon nga ang kwarta sa GSIS gipamalit og mahalon nga mga paintings. Nakadungog sad ta nga ang SSS duna say mga investments.

Sa ato pa, wala silay kwarta aron unta iusbaw sa pension sa mga retirees? Unsa ning klaseha sa panggobyerno? In fairness, hinoon, sayod ang gobyerno, aware ang Kongreso niini … hinungdan nga namugna ang R.A. 9257, o Expanded Senior Citizens Act of 2003, ug R.A. 9994, kon Expanded Senior Citizens Act of 2010, diin among others, giklaro nga kinahanglan i-review regularly ang pension sa mga retirees. Ania ang RA 9994, Sec. 4 (i):

“Retirement benefits of retirees from both the government and the private sector shall be regularly reviewed to ensure their continuing responsiveness and sustainability, and to the extent practicable and feasible, shall be upgraded to be at par with the current scale enjoyed by those in actual service.”

So, klaro kaayo. Apan, kinsa ug unsa man nga ahensiya sa gobyerno ang mopatuman niini? Wala ba masayod ang SSS ug GSIS niini? Kun wala man, kinsa man ang mopahibawo nila niini? Ug kinahanglan pa ba silang pahibaw-on? Kinahanglan ba nga dunay moaghat kanila pagpatuman sa balaud?

Si Benjie Culpa sa Tagbilaran City, mitawag sa atong tulomanon, Senior Citizens Hour sa DYRC pagpahibawo nga buot silang magpadala’g petisyon ngadto sa Malacañang paghangyo nga unta kausbawan ang pension sa mga retirees.

Balaud na kini, dili na unta kinahanglan pa nga mohangyo kita ug magpakiluoy sa SSS ug GSIS aron hilngon ang kahimtang sa mga benepisyo sa mga retirees … pag-review ug pag-upgrade. Duna ba kahay mahimo ang atong mga Kongresista ini no? At least, pagdumbol sa SSS ug GSIS … bisan na lang unta pagpabasa sa Sec. 4 sa RA 9994.

Kun mogahin kita’g pila ka milyon ka pesos aron ipalit og daghan kaayong condom, nganong di man kagahin og gamay’ng salapi idugang sa pension sa mga retirees? Unta mahilakip sa mga priorities ni Noynoy ang kahimtang sa mga retirees. Di lang una ta mamalit og daghan kaayong condom, ato unang atimanon ang ubang mga priorities, nga alang nako, mas urgent ug mas importante pa kay sa condom.

Libog kaayo ko … ambut ngano nga highly obsessed kaayo sila pag-acquire og daghan kaayong condom. Hilabihang lipaya sa mga condom manufacturer sa America ini! Usika sa nagnihit natong kwarta no? Wala kitay kwarta iusbaw sa pension sa mga retirees, apan, daghan kaayo ipamalit og condom … in support sa mga condom manufacturer ug pagpalambo sa condom industry sa atong nasud. 

Benjie, unsay tan-aw nimo ini? Duna kahay mahimo ang atong mga Kongresista ini? Mga tinugyanan ug mga representante man sila sa katawhan. Maka-represent kaha sila sa mga retirees, bisan og pagkuhit na lang sa SSS ug GSIS ug pagpangutana kun naunsa na ta ni?

Kun duna mo diha sa Bohol, suwayi sad kono’g contact ang Retirees Association sa inyong dapit. Tingalig duna na silay mga lakang nga gihimo aron mapatuman king maong balaud. Meantime, paminaw sa Senior Citizens Hour sa dyRC, 648 kHz matag Sabado, 4:00-6:00 pm, Tels. 4125298, 4125249.