Gibati og kabalaka sa mga vintage bomb

Gibati og kabalaka ang pipila ka molupyo sa barangay Looc, dakbayan sa Mandaue dihang ilang nasayran nga ang mokabat sa 385 ka mga vintage bomb nga gipahimutang sa usa ka bakanteng lugar. Nasayod na hinuon ang kapolisan sa maong kabalaka sa mga molupyo dihang nasayod nga ang maong mga vintage bomb gibalhin sa pagbutang sa ilang dapit gikan sa barangay Mantuyong sa maong dakbayan. Hinuon si Superintendent James Goforth, deputy director for operation sa Mandaue City Police Office (MCPO) miingon nga higpit nilang gibantayan ang maong dapit ug luwas kini sa katawhan kay layo man sa kabalayan.

Matud pa ni Superintendent Goforth nga nagpaabot sa lamang sila sa lakang nga pagahimoon sa ilang kadagkoan sa Police Regional Office (PRO) 7 tungod kay ang ilang buhatan sa MCPO wala man magbaton og igong kapasidad nga mga kahimanan alang sa pagguba sa maong mga bomba nga dili makamugna og kadaut sa kalikopan ug katawhan..

Dugang pa niya nga hangtod niining panahona wala sila makadawat og mga kasayuran sa mga plano sa ilang labaw nga mga opisyal sa PRO 7 sa pagahimoon sa maong mga bomba nga ilang gitipigan.

Gitataw ni Superintendent Goforth nga base sa inventory nga gihimo sa mga polis nga adunay kasinatian sa maong matang sa bomba nga 385 niini giila nga dili na kuyaw nga moboto gawas lamang sa 35 nga bisan gitaya na apan kuyaw pa gihapon ang pagbusikad niini.

Ang Cebu City police bomb squad nga mihimo og inventory miingon nga nagkalainlain nga matang ang maong mga bomba nga nagdala sa gibug-aton nga 4.7 toneladas o 4, 700 kilogramos.

Kahinumdoman nga ang maong mga bomba gikan sa usa ka establisamento sa barangay Mantuyong ug gitahan kini sa mga tagdumala ngadto sa kapolisan sa MCPO.