Nahingpit na ang alyansa sa Liberal Party ug Bakud Party sa 5th district niadtong Sabado.
Kini human sa pinirmahay sa usa ka kasabutan tali sa mga pangulo sa duha ka partido.
Human sa pinirmahay nga gihimo atol sa kasaulogan sa adlaw'ng natawhan sa haligi sa Bakud nga si Danao City Vice Mayor Ramon "Nito" Durano III nag-iyahay og sinaaray ang mga opisyal sa duha ka partido.
Matud ni Nito nga magmatinud-anon sila sa ilang kwalisyon ug dili mahitabong magbudhi sila sa kasabutan.
Ingon sab niini ang saad nga gihimo ni Secretary Mar Roxas ngadto ni Nito. Si Roxas nagkanayon nga mamahimo silang responsabli nga partner alang sa Bakud.
Ang tinuod wala magkinahanglan ang Bakud sa LP tungod kay makahimo ang lokal nga partido pagpadaug sa ilang kaugalingon kandidato diha sa ilang distrito.
Mas labaw'ng nagkinahanglan ang LP sa Bakud. Ang pagpanumpa sa mga lider sa matag partido nga way usang mobudhi nila sa kasabutan nagpakita lang sa kakuwang nila og kumpiyansa sa usa'g usa.
Kun sa bagay kinsa man tinuod ang mosalig sa usa ka partido nga oportunista?
Alang nako oportunista ang LP tungod kay dihang nakakita sa kahigayonan nga ikauban ang mas dako ug gamhanang pundok sa pamilyang Durano yano kaayo niining gisawilik sa daplin ang grupo nga maoy nilaban sa kandidato sa LP atol sa 2010 elections.
Sa miaging eleksiyon si Danao City Mayor Boy Durano maoy nangampanya alang sa mga kandidato sa LP didto sa 5th district apan karon nahanaw sa passing si Mayor Boy.
Sa pikas bahin ang Bakud mipirma og kasabutan uban sa LP nga makig-alyansa, apan sa samang higayon mideklarar nga suportahan nila ang kandidatura ni Gobernador Gwen Garcia pagkasenador.
Dili ba ni pagbudhi sa ngadto sa LP kung suportahan sa Bakud si Gwen nga usa man siya sa mga kandidato sa UNA?
Busa alang nako pulos taphaw ug pagpakaaron ingon ang mga saad sa duha ka partido nga way usang mobudhi nila sa kasabutan tungod kay sa sinugdanan palang way usa nila nga matinud-anon.
* * *