Madagayaong kinabuhi "Pagmahal sa Kaugalingon"

Samtang naglakaw si Mr. Castro nakaagni sa iyang pagtagad ang pundok sa mga batan-on nga nagsultianay. Ang labing matahom nagbagulbol kay ngil-ad ang iyang kuko. Ang usa usab wala malipay kay ang iyang buhok dili sama kanindot sa artista nga iyang gidayeg. Ang tanan ang bagulbol wala makontento kung unsa ang naa kanila. Pagyahat niya nakita niya ang usa ka dalagita nga nagtuon ug mapahiyomong nitimbaya sa iyang mga higala. Gipangutana kini niya ug mitubag kini nga maningkamot siya sa pagtuon kay bililhon siya sa ilang pamilya ug angay lamang nga ang pinakamaayo maoy iyang buhaton.

Angay nga wad-on ang paghuna-huna nga ang tawong nagmahal sa iyang kaugalingon hakog. Kay ang tawo nga naghatag og bili sa iyang kaugalingon adunay respetado ug dignidad sa iyang pagkatawo. Unsaon mo man pagpaabot sa pagmahal sa uban kung mismo ikaw wala magmahal sa imong kaugalingon?

Ang tumong sa kinabuhi mao man ang pagkamalumo ug kamaong mo mahal sa iyang isigkatawo. Pinaagi niining hinungdana ampingan mo ang imong kaugalingon. Kung ikaw dili kamao nga magpaambit kung unsay naa kanimo sama pananglitan sa mga gasa nga gihatag sa Ginoo kana magpaila nga hakog ka.

“Apan gibuhat mo siya nga ubos la’g diyutay kanimo, ug gipurongpurongan mo sa himaya ug kadungganan.”                                                                                                                                             Salmo 8:5