Generic nga sigarilyo

Ang sigarilyo usa unta ka paagi sa pagpalabay sa oras, sa mga tawo nga anaa sa sitwasyon nga permi gilaay sa kinabuhi. Ang uban tuyoon lang gyud nga manigarilyo aron ingnon nga nasakop siya sa hut-ong sa altasosyedad.

Apan ang mga eksperto sa kahimsog sa panglawas, mikompirmar nga kining pagpanigarilyo, makahatag gyud og dautang epekto sa kahimsog sa panglawas. Kay kining bisyoha, maoy hinungdan sa pagtumaw sa kuyaw nga sakit sa baga, gumikan sa perming paghanggap o pagbuhot sa hilo ang aso.

Sa mga nasod nga demokrasya, mao kini sagad ang problema, kay usa kini sa hinungdan nga daghang nangasakit o nahunosan sa kinabuhi. Apan ang gihimo sa atong kagamhanan, mao lang ang pagpahimangno nga kini maka-daut apan wa gyud mapahunong ang tinubdan niini, ilabi na dinhi sa atoa.

Ang nasod sa Australia, padayon nga nangita’g paagi nga mapugngan o mamenusan man lang ang kagrabe sa 5,000,000 nga nangamatay na tungod lang sa sigarilyo. Dihang patak-opan na unta ang mga buhatan, mialma ang mga nagprotehir sa sikat nga brand sa mga sigarilyo sa tibuok kalibutan.

Apan ang gobiyerno nakakita’g laing paagi bisag wa moepekto ang ilang unang gihimo. Nagpagawas sila’g balaod nga ang mga sigarilyo sa merkado, himoon nang mga generic o wa nay brand, unya duna pa gyu’y dagway sa masakiton nga ipatik diha sa pakete. Nasagmuyo ang mga buhatan niini apan padayon gihapon ang uban nga wa malisang sa kakuyaw sa pagpanigarilyo.