Madagayaong kinabuhi 'Kabag-ohan'

Sa pagsugod sa bag-ong tuig atong madungog nga matag tawo aduna gyu’y plano nga kabag-ohan para sa iyang kinabuhi. Ang uban niini natuman apan ang kasagaran nahulog lang sa kalimot kay lagi wala sa hunahuna ang pagtuman niini.

Ang pagsugod og usa ka butang dili sayon kay anaa ang pag-ukon-ukon kung kini magmalampuson ba. Daghan mga tawo nga nakab-ot ang tingusbawan kay naa man ang kaikag ug kaisog sa paghimo sa butang nga alang kaniya usa ka dakong hagit sa iyang panaw isip nilalang niining kalibutana. Gitagaan kita og kaalam ug kagawasan sa Ginoo sa pagbuhat sa butang nga makapalambo kanato ug pinaagi niini makatampo ka sa kaayohan alang sa kinabag-an.

Busa aron makatagamtam ka sa gitawag nga kalamposan ayaw pagtalaw sa buot nimong buhaton. Kung dili ka man molampos ayaw pagmakuli sa pagsugod og usab kay sa paghimo niini imong mabati ang tinuod nga kahulogan sa kinabuhi. Sa imong kadaugan unya madimdim mo ang kaanindot nga bation sa kalamposan. Salig sa Ginoo kay sa kanunay nagtan-aw siya kanimo.