Gipalabang sa konseho sa dakbayan sa Sugbo ang ordinansahon nga nagsilot og unom ka buwan nga pagkapriso o lima ka libo ka pesos nga multa o priso ug multa pa gyod niadtong mga magtutudlo ug mga ginikanan nga mamonal o manapat sa ilang mga anak. Ang tumong sa nahisgotang ordinansahon mao ang pagpanalipod sa mga bata nga gikan sa mga magtutudlo ug ginikanan nga dagmalan.
Ang Department of Social Welfare and Development ingon man ang Commission on Human Rights mihangop sa ordinansahon nga gipalabang sa konseho apan adunay mga ginikanan nga wala makauyon niini tungod kay sama ra kuno sila sa gikuhaan sa ilang katungod sa pagdisiplina sa ilang mga anak sa nahisgotang ordinansahon.
Ang anti-corporal punishment nga ordinansahon nga gipalabang sa konseho sa dakbayan sa Sugbo duplication na kini sa nasudnong balaod nga nanalipod sa mga bata batok sa abuso, pagpahimulos ug diskriminasyon o Akta Republika 7610 busa wala na kini kinahanglana.
Gawas niini, daw sama sa gikuha na ug gihikaw sa nahisgotang ordinansahon ang katungod sa mga ginikanan sa pagdisiplina sa ilang mga anak nga mga badlongon. Seguro gituohan sa mga konsehal sa dakbayan sa Sugbo nga dautan ang pagpitol ug ang pagpatagam sa mga bata ug anak nga badlungon pinaagi sa bunal. Ang wala nila masayri mao nga ang bunal, lusi sa bogan, kusnit sa dalunggan ug kasaba bunga sa pagmahal ug paghigugma sa mga ginikanan ngadto sa ilang mga anak.
Yabag ang ginikanan nga manapat ug mangasaba sa ilang anak nga walay nahimong kasaypanan. Hanggaw ang mga ginikanan nga managmal ug mangasaba sa ilang mga anak bisag walay igong hinungdan. Busa ang mayor sa dakbayan sa Sugbo Mike Rama kinsa usa usab ka amahan kinahanglan nga mokonsiderar sa iyang pagka amahan sa pag-abot unya sa nahisgotang ordinansahon sa lamisa sa iyang buhatan aron pirmahan.