EDITORYAL - Ang mga bay nga kabilin ug ang road widening

Sa mga lugar diin mag-abot ang panginahanglan sa goberno alang sa road widening project ug sa mga tag-iya og mga karaan o matawag nga heritage building mahisama ra sa mga pangutana, nga kun magdungan ang trak sa bombero ug ambulansiya sa pagdagan, unsa may hatagan og higayon nga mag-una, ang ambulansiya ba o   trak sa bombero.

Simpre, ang trak sa bombero maoy hatagan og prayoridad tungod kay daghan ang kinabuhi ug kabtangan ang salbaronon niini itandi sa usa ka ambulansiya nga kasagaran tagsa ra ka kinabuhi ang salbaron niini.

Mao kini karon ang isyu bahin sa usa ka widening project sa kagamhanan sa usa sa mga lugar ning dakbayan nga giingong mikisikisi ang mga tag-iya sa gitawag nga mga heritage, o karaan ug kabilin nga balay kay di sila gusto nga gub-on ang ilang mga balay tungod kay protektado kini sa balaod.

Alang kanila bahala na kun magpabilin ang kagamay sa karsada nga alang sa publiko ug kadaghanan sa ilang lugar basta magpabilin lang gyud nga di hilabtan ang ilang balay.

Kay unsa ba gyud diay ang balaod kalabot sa mga butang nga gitawag nga heritage.

Itolerar ba gyud diay ang pagpabarug niini sa lugar nga gikinahanglang ugmaron sa goberno alang sa kadaghanan, sa laktud mao kini mosanta sa mga maayong laraw sa kagamhanan gumikan sa pagka-heritage sa maong mga butang.

Unsa ba gyud diay ka importante ang maong butang itandi sa gikinahanglang kauswagan sa mga agianan sa sakyanan nga mosulbad sa kahuot sa trapiko.

Oi kun mao na man lang na nga moatras ang goberno sa pagpalapad sa karsada nga gitumong alang sa kasulbaran sa dagan sa trapiko   tungod lang sa mga apektadong karaan nga mga edipisyo, aw angay kanang husgahan   sa mga maghuhukom sa kagamhanan ug di kay magpakahilom na lang ang kagamhanan tungod lagi kay mahadlok mopatuman sa balaod gumikan sa kagamhanan   sa tag-iya sa mga karaan ug kabiling mga edipisyo nga apektahan sa road widening project niini. Di ba?