Ang United Nations mideklarar nga ang Marso 20 matag tuig ilhon nga International Day of Happiness. Ug miawhag kini sa tanang tawo sa kalibutan sa paghudyaka ug isalikway ang pagkamasulub-on.
* * *
Angay nga hangopon kon hangpon ang maong gihimo sa United Nations. Aron dunay kalipay nga mohari sa kalibutan diin daghan ang masulub-on gumikan sa kapait sa kinabuhi.
* * *
Kanunay kita gipahinumduman sa mga eksperto nga ang pagkamalipayon -- ang pagkatawa -- makahatag og dakong kaayuhan sa atong panglawas. Niining maong kamatuoran gihatagan og dakong suporta sa Tinipong Kanasuran pinaagi sa pagdeklarar og International Day of Happiness matag Marso 20 kada tuig.
* * *
Hinaut unta nga kining deklarasyon sa United Nations hatagan og sinserong pagtagad sa katawhan ug dili ibaliwala lamang.
* * *
Ang kadagkuan sa Tinipong Kanasuran naka-obserbar tingali nga tungod sa kapait sa kinabuhi nga giatubang sa katawhan karon kinahanglan nga dunay mahimo ang UN alang sa pagpatunhay sa kalipay sud sa kasingkasing sa matag usa ka binuhat.
* * *
TRIVIA. Mangumusta kita sa mga taga Banilad ug Talamban diin nagpadayon og kakusog ang suporta sa mga magbabasa nato dihang dapita. Daghang salamat!