Gawasnon ug nagkahiusa

Manumpa na ang bag-ong mga opisyal sa Kapisanan ng mga Brodkaster ng Pilipinas (KBP) Cebu Chapter sunod buwan. Kanus-a si Atty. Ruphil Bañoc sa DYHP sa Radio Mindanao Network (RMN) gitakdang motunol sa liderato ngadto sa bag-ong napili nga tsirman nga si Marlon Baula sa Hot ug Yes FM sa Manila Broadcasting Company (MBC).

Takos ug hinog na si Baula sa bag-o niyang katungdanan. Siya ang kanhi executive vice chairman sa KBP Cebu Chapter ubos ni Bañoc. Nahimo na sab siyang Standards Authority (SA) Officer sa nangaging mga pamunoan. Siya ang responsable sa paghusay sa mga kaso batok sa labing kontrobersiyal nga mga magsisibya. Nga nisangpot sa pagsuspenso ug pagmulta sa pipila nga napamatud-ang sad-an.

* * *

 Manumpa uban ni Baula mao silang Zosimo "Jun" Tagalog sa DYLA ug Smash FM sa Vimcontu Broadcasting Corp. isip executive vice chairman; Rogelio "Roger" Calope sa Win Radio sa Progressive Broadcasting Corp. isip vice chairman sa FM; Yolanda "Yoli" Gendrauli sa ABC/TV5 isip vice chairperson sa TV; Jose Maria "Ayie" Lanza sa Love Radio sa MBC isip secretary; Victor Toledo sa Crossover sa Mareco Broadcasting Network Inc. isip treasurer;

 Vergilio "Manny" Galicia sa Smooth FM sa Best Broadcast Corp./Primax Broadcasting Network isip auditor; Joseph "Jo" Luna sa Monster Radio sa Audio-Visual Communicators Inc. isip PRO; Raul "Bong" Roxas sa Wild Radio sa University of Mindanao Broadcasting Network, Raul Credo sa iFM sa RMN ug Julius Manahan sa Home Radio sa Aliw Broadcasting Corp. isip mga sakop sa board of directors; ug Atty. Cynthia Barte sa DYHP-RMN isip legal counsel ug SA officer.

* * *

 Sa iyang panamilit, si Bañoc nipasidungog sa kalamposan sa KBP Cebu Chapter paghiusa sa mga magsisibya sa Sugbo, bisan atubangan sa labing lisod nga mga pagsuway sa industriya ug sa pipila ka magsisibya. Matod niya sukwahi ang nahitabo sa ubang mga lalawigan nga nag-unay ug maglisod gani og kab-ot og quorum sa ilang mga tigom ang mga magsisibya.

 Ang pamunoan ni Bañoc nilampos pagpugong sa mga pagsuway sa kadagkoan sa kapolisan pag-ban sa live coverage sa hostage ug crisis situations.

* * *

 Si Baula niawhag sa mga magsisibya sa pagpadayon pagpaluyo sa nagkalainlaing kalihokan sa KBP Cebu Chapter. Labi na sa Broadcasters Month karong Septiyembre. Nipasalig siyang padayunon ang mga paningkamot paglimpiyo sa kahanginan gikan sa iresponsableng mga sibya ug pakigbisog sa pagpanalipod sa katungod sa gawasnong pagpanibya.

 Ang KBP Cebu Chapter gipasidunggan sud na sa daghang katuigan isip usa sa labing maayong sanga sa tibuok nasud. Kini tungod sa katakos sa mga magsisibya sa paghiusa, bisan sa higpit nga panagtigi sa networks nga ilang girepresentahan, alang sa mga kawsa nga mas mahinungdanon kay sa personal nilang mga interes.

* * *

Email: [email protected]