Kuwang ang bombero

Mapun-an na usab ang pwersa sa atong kabomberohan dinhi sa Central Visayas gumikan sa gihimo karon nga recruitment. Bisan tuod og gamay ra ang madugang dako kini og ikatabang sa kakuwang sa atong fire personnel hilabi na ngadto sa mga kalungsuran nga nagnihit gayud ang atong kabomberohan.

Dunay 200 kapin ka aplikante nga nag-submit sa ilang aplikasyon apan 37 ra ang masulod unya niini pagkahuman sa recruitment process. Sa dugay nang panahon,dako kaayo kining suliran sa BFP dili lamang dinhi sa Central Visayas apan lukop nasud ang kakuwang sa atong kabomberohan.

Mas maayo siguro og daghanon unta ang bakante aron matubag na ang dugay na kaayong problema. Medyo karaan na ang mga fire trucks kuwang pa gyud sa personnel.Alang sa inyong kasayuran ang ideal nga crew sa usa ka firetruck moabot og walo ka personnel.

Gumikan lagi sa kakuwang sa bombero paigoon nalang kini ug mangita og pamaagi sama sa pag-organisar ug pag-train og force multipliers sama sa volunteer fire brigades sa kabarangayan, tunghaan ug bisan sa pribadong sektor. 

 Dili gyud malalim tinood apan bisan pa man sa maong mga apan, nakita man siguro ninyo ang among abtik ug tinud-anay nga panerbisyo. Manghinaut lang kita nga matubag na unta kining mga yangungo dili lamang sa BFP mismo apan ang mga yangungo sa among boss nga mao ang publiko.

Sa kadtong buot motukod og fire brigades ayaw kamo pagpanuko sa pagduol sa among buhatan aron amo kamong matabangan sa pagtukod niini hilabi na sa pag-train sa inyong mga members.

Sa pikas bahin, nag-courtesy call ang among bag-ong Provincial Fire Marshal sa Cebu Province si SUPT. NEPOMUCENO DANGOY ngadto kang Governor Gwendolyn Garcia. Bisan sa mubong higayon nga pakigkukabildo sa atong gobernador daghan ang nahisgotang mga plano aron sa pagpalambo pa sa fire service sa tibuok lalawigan sa Sugbo.

Gihangop sa gobernador ang mga plano sa bag-ong lingkod nga PFM ug sa walay pagduhaduha mipasalig kini nga muhatag sa iyang dakong suporta ilabi na sa Memorandum of Agreement (MOA) tali sa BFP ug Cebu Province.

Ang unod sa maong MOA nga kinahanglan nga dunay BFP personnel sa mga fire trucks sa Kapitolyo ug ang local government units nga gipiyalan niini maoy moabaga sa maintenance, logistics ug krudo niini. Kini gipasalig ni Supt. Dangoy nga iyang tumanon.