Problema sa pamilya ang anak nga adik-adik

Nahimong dakong problema sa usa ka pamilya sa Pasil sa dakbayan sa Sugbo ang kamanghuran nilang anak nga lalaki nga hilabihan ang pagkagumon sa paggamit sa ilegal nga drugas.

Ang amahan ug inahan nga pulos na senior citizen naglibog na sa ilang angay nga buhaton tungod kay gihimo na nila ang tanang pamaagi alang unta sa pagpakgang sama sa pagpasulod sa drug and rehabilitation center ug uban pa. Ang amahan nga nahinabi niining tagsulat miasoy nga unom ang ilang anak ug sa iyang asawa ug lalaki ang ilang kamagulangan ug lalaki usab ang ilang kamanghuran.

Dugang pa niya nga sa unom nila ka mga anak maoy labing pinangga nila ang kamanghuran nilang lalaki nga mao usab ang nahimo nilang dakong problema sa pamilya kay mao man ang nagumon sa paggamit sa shabu ug nuvain, marijuana ug uban pa.

Gihimo nila ang tanang paagi nga kapugngan unta nila nga dili mahingpit nga maguba ang maayo niining kaugmaon apan wala gayod sila buligi sa maayong kapalaran sanglit nagkagrabe man gayod ang pagkaadik niini sa paggamit sa ilegal nga drugas. Matud pa sa maong amahan nga nabalhog na sa bilanggoan ang mao niyang anak nga adik-adik dihang nadakpan kini sa kapolisan sa kasong pagpangawat. “Napuno na sa uwat ang mga bukton ug liog anang bataa kay unayon man pag-abis sa kutsilyo sa higayon nga ma-high kini sa paggamit sa ilegal nga drugas,” nagkanayon ang amahan.

“Midangop na gani ko sa mga polis nga akong ipapusil ang tiil aron makimpang,”dugang pa niini. Giangkon niya nga gikalipay sa ilang pamilya dihang nabalhog kini sa bilanggoan kay nagmalinawon man ang ilang panimalay ug daw maibtan og tunok ang ilang pamilya niadtong higayona.

Nibalik ang mao nilang suliran sa pamilya karong panahona dihang nakagawas kini sa bilanggoan ug misamot pa gayod ang pagkamangtas niini sa paggamit sa ilegal nga drugas. Gitug-an sa maong amahan nga dili nila kasaligan ang mao nilang anak nga adik-adik tungod kay numero uno kining kawatan sa kaugalingon nilang mga butang.