EDITORIAL - Miriam mipakagamay sa boto sa Katoliko Ni Wen Celen

Murag giminusan si Senador Miriam Santiago  sa boto sa mga Katoliko nga alang kaniya di angay kahadlokan sa mga senador nga mobotar aron kaaprobahan ang Reproductive Health (RH)Bill.

Wa ba siya kahibawo nga mayoridad usab sa mga magtiayong Katoliko way gusto sa RH Bill.

Kini bisan sa kamatuoran nga ang maong balaodnon mo-pabor o mosuporta sa   kababayen-an kinsa maoy mabuktot sa kaugtas (stress) kun magpunay og panganak.

Di nalang igsapayan kun way ikapakaon sa anak, way ika-paedukar sa anak, apan ang kapeligro sa kinabuhi sa usa ka babaye nga magpunay og panganak usa ka matang sa panaugdaog sa physical nga kahimtang niini.

Ang usa ka asawa puno kaayo sa kaugtas kun magpunay og panganak ilabi na sa mga adlaw sa iyang pagpanganak diin giingon  nilang maglatay sa usa ka lugas lanot ang iyang kinabuhi

Kanang giingon nila nga kausa ra ang sakit sa pagpanganak apan daghan ang lami , usa ka panultihon nga kinomedya ug “non-sense” sa English pa,    kay ang tinuod, gawas nga mag-ugtas ka sa pagpanganak ang usa ka kabus apan normal ug pangutok nga   asawa mag-ugtas kini kun duawon sa sakit ang anak,

Ang usa ka normal apan kabus nga inahan di kalikayang magbakho    sa hilom kun ang bata nga iyang gipanganak di makatagamtam sa kalipay nga matagamtaman sa ubang mga anak kansang ginikanan kuwartahan.

Labaw sa tanan, di matukib ang kaugtas sa usa ka inahan kun ang iyang anak di kahatagan niya sa tukmang edukasyon gumikan sa kakabus.

Busa alang sa usa ka normal nga asawa, kaantigo siya modisiplina sa iyang bana nga gusto lang mopaburot kaniya kanunay unya way plano kun inigkatawo sa bata may ikapakaon, ikapabiste, ug ikapa-edukar ba siya niini.

Apan basin nasayop si senador Miriam, kay ang mayoridad sa mga Filipina wa maghuna-huna niini kay alang kanila mas ganahan sila   maminaw sa mga tawong nagmandar nga pasigihon gyud sila sa pagpanganak ilabi na kun mipasalig kini nga motabang sa pagpa-edukar sa ilang mga anak. Di ba?