BRT hapit na g'yud!

Pabor ko nga minus-minosan ang gidaghanon sa mga passenger jeepneys nga tugotang makapamasahero dinhi sa dakbayan ug hatagan nato og higayon nga maka-operate ang Bus Rapid Transit (BRT).

Pipila ka semana gikan karon, si Colin Brader nga managing director sa Integrated Transport Planning Ltd., mosumiter na sa iyang report kabahin sa Feasibility Study sa sugyot nga mag-operate og BRT sa Cebu City. Sa pasiuna nga report ni Brader nga iyang gihatag ngadto sa mga sakop sa media gitataw niya nga ang mga pasahero nga mosakay sa BRT mas luwas kay sa PUJ kay rekisahon man sila sa dili pa mosakay sa bus.

Bitaw, walay kwestyon ana nga aspeto kay bentaha man gayud tuod ang BRT kay inigsulod nimo sa bus station, hilngon ka man dayon sa mga gwardya. Apan wala sila makatubag sa pangutana kun unsay himoon nila kun ang usa ka pasahero adunay armas, sama sa mga licensed gun holders. Giingnan ko ni Traffic Expert Bobit Avila nga si Brader dili makatubag niini kay naglambigit kini og security matters.

* * *

Atul sa paghisgut niining maong isyu kagahapon, nahisgutan ni Mayor Michael Rama ang pagdagsang sa mga flyover projects. Nabalaka si Rama nga maapektohan ang BRT sa pagtukod og mga flyovers. Bitaw, dunay posibilidad nga ang flyover makahatag og dakung epekto sa BRT operations. Pananglit sa mga karsada nga gagmay ra, unsaon man paghimo og BRT lane?

Ang BRT gud alang niadtong wala kaayo makasabut, dunay itagana nga kaugalingon niya nga agianan nga dili mahimo nga agian sa ubang sakyanan, labi na ang mga PUJ. Sa ato pa, pananglit diha sa Osmeña Boulevard gikan sa Kapitolyo paingon sa Plaza Independencia, tag tulo ka lanes ang karsada sa usa ka direksyon.

Gipahibalo kami ni Maricor Encabo nga maoy point person sa City Hall kabahin sa BRT project, nga ang “most inner lane” dapit sa center-island maoy itagana alang sa mga BRT.

Aron nga BRT ra gayud ang makagamit niini maong lane butangan kini og mga road barriers aron dili makasulod ang ubang sakyanan. Apan maayo lang kini sa Osmeña Boulevard kay lapad man ang karsada. Pananglit gamay ang karsada, unsaon man?

Daghang mga drayber og PUJ nga nahadlok kay basin og mawagtangan sila’g trabaho. Ang tubag nako kanila mao nga pangaplay mo nga mahimong drayber sa BRT.

Sigurado hinoon ko nga daghan sa mga PUJ draybers, ilabi na kadtong mga namalit lang og lisensya nga wala gayud mo-examine sa LTO, kay dili man gayud makapasar sa examination.

Unsaon, daghang mga PUJ drayber nga nag-drive na og jeepney human sa pipila ka tuig nga nahimong drayber og habal-habal. Tan-awa ang ilang pinadaganan, mora’g nag-drive og motor.

Uy, kamong mga drayber og four-wheel vehicles, sultihan ko kamo nga lahi tawon ang pag-drive og four-wheel kay sa mag-drive og motorsiklo. Pareho adtong miaging buntag, diha na ko sa lane nga para niadtong mo-left turn sa Escario Street gikan sa Gorordo Avenue mga alas 7 sa buntag. 

Direyot ko madisgrasya kay ang usa ka drayber og PUJ nga mora’g kuwang og panghuna-huna, mi-overtake nga didto moagi sa pikas lane. Aw, wala gayud mosipyat kay gisakmit nako ang iyang lisensya ug gi-cite og reckless driving. Maayo ra usab uy nga maibanan kining badlongon nga mga PUJ drivers.