EDITORYAL - Gatas nga gipabrika sa China peligro

Nabalita karong bag-o nga ang mga gatas alang sa masuso nga gipabrika sa China gipahabwa gikan sa mga tindahang namaligya niini dinhi sa nasud   kay nadiskobrehan sa mga tinugyanan sa kagamhanan nga may sagol nga mercury ang maong mga produkto nga maghatag og dakong peligro sa kinabuhi sa mga bata nga makainom niini.

Nasayod na kita nga ang mercury kun makasulod sa lawas sa tawo mahimong sinugdanan sa nagkalainlaing sakit nga mosangpot sa kanser ngadto sa kamatayon.

Kun wa pa madiskobrehe sa mga otoridad, aw hayan nga daghang mga bata nga madisgrasya sa maong mga produkto.

Apan dili mahimong way madisgrasya tungod kay ang tanang wa masayud sa makamatay nga sambog sa maong gatas, segurado nga nakainom na og mercury ang maong mga bata   busa maingon nato nga ugma-ugmaon nalang ang ilang kinabuhi gawas kun makapangita dayon ang mga ginikanan og panagang niini.

Kining China daghan kaayo og mga produkto nga binuang nga usa   sa nakapadatu sa maong nasud.

Wa baya ni sila gabai nga kadaghan naman diskobrehi ang ilang mga binuang sama sa candy nga gisagolan    og hilo, mga duwaan nga may sagol usab nga mercury ang pintal ug uban pang mga produkto nga gibutangan og mga kemikal nga sarang mopatay sa mga tawong makakaon niini.

Di man hinuon tanang mga prudokto sa China may sagol nga makamatay, may mga tarong usab nga produkto sa maong nasud nga nakatabang usab sa mga Filipino.

Sama niining mga barato kaayo nilang mga appliances, mga piyesa sa sakyanan ug uban pa, nga barato ra kaayo apan di durabli.

May mga bentilador silang baligya nga barato   kaayo apan kun di ka makabantay, usahay maoy mahimong sinugdanan sa sunog sa balay.

Mga piyesa sa sakyanan nga magamit nimo og kausa, kaduha, unya imo nang ilabay kay   guba na.

Kun di pa lang daghang kabus dinhi sa nasud, mas maayo baya nga di na angay pang mamalit nianang mga produkto nga gikan sa China kay dako kaayo og ikadaot sa kinabuhi , pagpuyo ug uban pang aspeto sa panginabuhi. Di ba?