Inagulo sa Carcar vendors

Misumbong niining lindog ang pipila ka mga vendors sa Carcar nga wala makaangkon og puwesto sa ilang merkado. Kini sukad sa paglingkod ni Mayor Neci Apura nga daling mipahapsay sa Carcar Public Market. Wala gyud sila hatagi og relocation site para mahapnig sa usa ka lugar ug magbayad lang unta og arkabala. Hingpit silang nakulban sa panginabuhi kay wala paminawa ang ilang hangyo ug inagulo.

* * *

Nahugno ang naninda’g anagon nga mais sa Carcar nga gisakmit sa mga tinugyanan sa merkado sanglit wala siya’y stall. Ipalukat og P500 ang iyang tinda nga inangkat og P550.Wala na lang lukata ug giingnan ang mga tinugyanan sa merkado nga ipahurot na lang nila’g usap ang iyang tindang anagon. Gisakmit sab ang mga ahos nga gisuroy ug gitinda sa usa ka batan-on. Giistrikto og maayo ang mga vendors sa maong siyudad lakip na ang koleksyon sa abangan sa mga stalls. Gipanubay usab ang mga gagmay’ng tindahan sa kabarangayan aron palukaton og business permit.

* * *

Misaka ang koleksyon sa panudlanan sa siyudad sa Carcar. Kini tungod sa istriktong pagpaningil sa buhis, abangan sa stalls ug business permit sa mga tindahan sa kabarangayan. Ang dili lang maayo kay misaka sab ang krimen. Sa panahon ni kanhi Mayor Patrick Barcenas dali ra siya nilang mahangyo hinungdan nga nagkadako ang utang sa mga vendors sa ilang abangan. Mga sidewalk ug ambulant vendors gipasagdan sa ilang kapanginabuhian. Unsay inyong pilion? Gubot nga merkado nga dunay kagawasan sa pagpaninda o hapsay nga merkado nga daghang nakulban sa pamugas? Maayo tingali gahinan sila’g relocation site kay duna baya sab silay tiyan nga gutomon, di ba?

* * *

Kadto diay’ng ginikanan ni Senador Manny Villar usa diay ka vendor og isda sa Divisoria. Nadato sila sa kakugi ug determinasyon. Dili matagna ang kapalaran sa tawo ilabina og buligan sa Ginoo. Kadto usab si Pantaleon “Leon Kilat” Villegas naninda’g pan sa usa ka bakery diha sa Pahina Central. Kini sa wala pa magpasakop sa Katipunero nga nahimong bayani nga maisogong nakig-away sa bangis nga mga Katsila sa gubat sa Tres de Abril. Giunay siya og patay sa Carcar sa kauban ra usab nga Katipunero kay gipangigihan. Wala pa ko matawo sa maong hitabo. Nahibaw-an lang nako pinaagi sa nabasahan nakong libro.

*   *   *

Salamat sa text message sa mga vendors sa isdaan sa Lapu-lapu City nga walay sal-ang nga nagbasa ning akong lindog. Hinoon wala man sila magpaila sa ilang ngalan apan ilang gisaysay ang ilang inagu. Ang ilang inagulo nga kaadlawon pa sila moladlad sa ilang mga isda ug dugay pa gyud mahurot. Apan sa ilang Dencio-Elvie ulahi na moabot apan unang mahurot og kahalin. Basin dunay lumay sila si Dencio-Elvie, he he he.     ([email protected]/0906-648-9637)