Daw sa hinay-hinay man nga nitalaw ang ig-agaw ni Mayor Michael Rama nga si Annabelle sa iyang tinguha nga magkongresista sa North District dinhi sa dakbayan.
Kun niadto matud niya sigurado na siya sa iyang plano, karon nausab man ang tunada.
Ang labi niyang awahi nga pamahayag mao nga mag-agad na sab kuno siya sa mamahimong resulta sa survey.
Iyang giangkon nga nagpahigayon sila karon og survey pagkuha sa pulso sa katawhan.
Sa bagay husto pud hinuon nga mamulso sa dili pa mahinayak.
Sa pikas bahin, daw pabor ang pulso sa publiko alang ni Konsehal Rodrigo Abellanosa nga maoy mamahimong sunod nga kongresista sa South District hulip ni Kongresista Tomas Osmeña nga mobalik pagkamayor.
Matud pa nga sa survey sa Bando Osmeña Pundok Kauswagan kon BOPK si Abellanosa maoy nag-una.
Kini maoy hinungdan nga ang BOPK miisip niya sa pagkakaron nga posibling maoy ilang kandidato sa south.
Alang nako angayang di magsalig ang BOPK og survey pagpili sa ilang kandidato.
Wala magkinahanglan ang BOPK sa survey aron pagpadaug og kandidato tungod kay ang impluwensiya ug makinarya niini igo na nga makaparatol sa kontra.
Ang gikinahanglan sa BOPK mao ang pagpili og kandidato nga haum sa pwesto ug dili maghatag og kauwawan sa mga Sugboanon.
Kun ako’y Osmeña akong pilion ang kandidato nga dunay igong katakos ug abilidad paghatag og tingog sa mga Sugbuanon didto sa kongreso.
Ug pasayloa nga si Abellanosa maoy klase sa kandidato nga angayang mamahimong representante sa dakbayan didto sa Kongreso.
Kun karon pa lang si Abellanosa kanunay nang molihay sa mga media interviews, dako ang kahigayonan nga madugang siya sa listahan sa mga sakop sa committee on silence didto sa kongreso.
Usa ka tawo gawas ni kanhi kongresista Antonio Cuenco ang akong nakit-an nga dunay dako og katakos nga mamahimo nato nga representante.
Siya mao si kanhi DOTC undersecretary Aristotle Batuhan. Atol sa iyang pangatungdanan sa DOTC daghan sa mga Sugbuanon ang iyang natabangan nga makahupot og pwesto.
Pipila nila mao ang general manager sa Mactan Airport ug duna poy nahimong commissioner sa Cebu Ports Authority.
* * *