Unsay imong Halad?

Unsay imong ikahalad alang sa labing nagkinahanglan natong kapamilya? Mao ni among pangutana sa DYAB Abante Pa Bisaya! tibuok semana karong semanaha. Samtang gihingpit ang nagkataas nga listahan sa mga pangalagad nga ikatanyag atol sa Grand Halad sa Kapamilya (GHSK). Nga maoy motapos sa tibuok buwan nga kasaulogan sa ika-17 namong anibersaryo.

Ang labing dakong piyesta sa libreng mga pangalagad, nga ipahigayon matag Hunyo ug Nobyembre matag tuig, himuon sa hamugaway nga main campus sa Cebu Normal University (CNU) sa Osmeña Blvd. ug R.R. Landon St. Magsugod sa alas-6 sa sayong buntag hangtod sa alas-5 sa hapon karong sunod Sabado, Hunyo 30.

* * *

Way kabos nga way ikatabang. Samang way adunahan nga wa magkinahanglan og tabang. Ang GHSK sud na ron dul-an sa dekada nagsilbi nga taytayan aron magka-abot ang mga may katakos ug kasingkasing sa pagtabang ug ang mga labing tabanganan.

Di ikalimod ug labaw nang di mapasagdan ang kadaghan sa mas nagkinahanglan og tabang atubangan sa nagkalapad nga kakabos ug katimawa sa nasud ug sa katawhan. Nag-unang mga panginahanglan ang kahimsog, pagkaon, panginabuhi, edukasyon, trabaho, tambag, katin-awan, pagdasig, mahigalaong pikpik, o yanong abaga nga kasandigan ug kabakhoan. 

Nga maoy sukaranan sa mapangahason namong pangutana: Unsay imong ikahalad alang sa mas nagkinahanglan natong kapamilya?

* * *

Hingpit ming nagtamod sa pagtuo nga mas katabangan ang tawo di sa paghatag niya og isda, nga makabuhi niya sud lang sa usa ka adlaw, kun dili sa pagtudlo niya unsaon pagpangisda, nga mobuhi niya hangtod sa hangtod. Maong apil sa nangaging GHSK ang pagtudlo unsaon pagpangluto isip panginabuhi, pagsugod og negosyo nga way puhonan ug pagpalambo sa patigayon pinaagi sa pagtino nga ang halin di mahurot og panukli.

Nagpabilin hinuon nga labing gipunsisokan ang libreng konsultasyon ug tambal, libreng antipara, libreng ibot sa ngipon, libreng operasyon, libreng x-ray ug ubang laboratory services, libreng notaryo ug tambag sa abogado, libreng veterinary services ug libreng masahe ug ubang wellness services.

* * *

Nag-una sa mga sugyot nga among nadawat mao nga gawas sa naandan na sa GHSK nga one-stop-shop sa mga serbisyo sa gobyerno, dapiton sang mga politiko di aron modiskurso kun dili aron sa pagpangunay pag-atiman sa mga suliran sa ilang agawong mga magbubuhis. May nisugyot sab nga tudloan ang bata ug dagko sa paglangoy atubangan sa nag-usbaw nga mga insidente sa baha tungod sa di na matag-an nga pag-usab-usab sa kahimtang sa panahon.

Giawhag sab ming mag-seminar alang sa batan-ong mga ginikanan unsaon pagmatuto ug unsay batakang katungod sa ilang mga bata ug sa mga tinun-an di lang sa unsay labing tukmang kurso nga angay’ng kuhaon kun dili sa unsay gugma, paghigugma ug panaghigalaay.

Unsa may imong ikahalad sa mas nagkinahanglan natong mga kapamilya?

* * *

Email: [email protected]