Ang Sin Tax Law sa gobiyerno

Gihingusgan sa gobiyerno ang paghigpit alang sa pagpalabang sa gisugyot nga balaudnon nga gitawag og Sin Tax Law nga hugot usab nga gipaluyohan sa kadagkoan sa Department of Health (DOH) dinhi sa nasud.

Ang maong balaudnon nga giisip nga usa sa mga priority bill ni Pangulong Benigno Noynoy Aquino III, maoy pagpatong og dugang pa nga buhis gikan sa sigarilyo, pag-inom og ilimnong makahubog sama sa alak, beer ug uban pa. Kun mahingpit na unya ang pagpalabang sa maong balaudnon daghan sa mga hinabako ug kusog nga moinom sa mga ilimnong makahubog ang mapugos sa pag-undang sa maong bisyo.

Kun mahitabo kini daw langawon na unya ang mga balay kahilayan nga ang ilang gisaligan nga mokita og dakong kantidad nga salapi gikan sa ilimnong makahubog ug sigarilyo nga ilang ibaligya panahon sa kagabhion. Sa nasayran nga gisuportahan ang maong balaudnon sa kadagkoan sa DOH ug ilang gipasabot nga ang pagpatong og dugang buhis sa sigarilyo ug sa mga ilimnong makahubog mao unya ang makaingon nga mapugos pagbiya og panigarilyo ug pag-inom sa ilimnong makahubog ang mga tawo naggumon sa maong bisyo.

Ang maong pagtuo sukwahi usab sa gipadayag sa uban nga kusog manabako ug moinom og ilimnong makahubog tungod kay bisan kun mahal pa ang pagbaligya niini dili kini makapahunong kanila.

Dugang pa sa mga hinabako ug mga palahubog nga dili ikatumbas og salapi ang bation nilang kalipay sa matag higop nila sa aso sa sigarilyo ug matag lad-ok nila sa ilimnong makahubog.

Gitug-an sa DOH nga daghan kaayo ang gipangtakboyan og bug-at nga sakit sama sa cancer sa baga ug uban pa nga ang hinungdan mao ang pagkahinabako ug pagkapalainom sa ilimnong makahubog.

Hinuon sa mga kabus nga hinabako ug palahubog wala sila batiag kabalaka nga usbawan ang buhis sa sigarilyo ug ilimnong makahubog kay tabako man nga gilikit ug dahon sa lumboy ilang gitabako ug sa ilang paghuboghubog ang tuba man ug bahalina maoy ilang giinom.