Baniog kaayo sa nasud nga ang mga banggiitang tulisan karon taga Osamiz ug uban pang bahin sa Mindanao.
Dugay na kaayo ning isyuha ug gani ang ubang mga banggiitang tulisan sa maong lugar nangamatay na ug ang uban may mga anak na o kaha mga apo.
Gumikan kay way pagkapuo ang maong mga tulisan, nagpasabot nga gibilin sa nangamatay nang tulisan sa ilang mga anak ang ilang pagkatulisan.
Busa nahimo nang kabilin sa henerasyon ngadto sa henerasyon ang pagkatulisan sa ubang taga Osamiz.
Ang uban nagduda nga malagmit di tingale mangunay og tulis sa ilang lugar ang maong mga tulisan kay wa man igdungog nga gipuhag sila sa mga polis sa ilang lugar.
Apan kun ugaling manulis kini sa ilang lalawigan unya wa puoha sa kapolisan, daghang natahap nga basin may bahin ang ubang kapolisan sa tinulis sa maong mga tulisan.
Aw hinuon pagduda ra man kana sa katawhan ug di usab nato sila mabasol sanglit ila mang katungod usab ang pagpalihok sa ilang katahap.
Daghan man gud nga tawo ang naglagot niining mga tulisan kay sa higayong molihok sila di kalikayan nga may mapagan nga laing mga tawo ilabi na kun magkapinusilay na ang maong grupo ug ang kapolisan.
Busa tungod kay ang ilang bisyo makadaot man sa kinabuhi ug kabtangan, angay baya nga tutokan sa kapolisan sa lalawigan diin sila maggikan ang pagpitol kanila.
Di baya lalim nga mao na sa ginhawa sa mga negosyante pagtigom og kuwarta unya sa usa lang ka pamilok mawagtang gumikan kay gitulis.
Dako kaayo ang idulot nga kadaot niining mga tawhana ngadto sa mga negosyante sa mga lugar nga himoan nila og operasyon.
Tungod kay nailhan man sa kapolisan sa Osamiz ang maong mga tulisan ambot kun wa ba kaha sila’y plano sa pag-salvage kanila buwahan to mag-anam-anam sila og kapuo ug di na makapruhisyo sa publiko? Di ba?